Abśledavańnie fizičnych asob u aŭtadarožnych punktach propusku na dziaržaŭnaj miažy Biełarusi budzie dobraachvotnym, paviedamiŭ 8 krasavika na bryfinhu ŭ Minsku načalnik hałoŭnaha ŭpraŭleńnia statystyki źniešniaha handlu Nacyjanalnaha statystyčnaha kamiteta Biełarusi Vital Kulaševič.
«Abśledavańnie budzie dobraachvotnym i ananimnym. Kali my budziem prymušać ludziej da abaviazkovaha zapaŭnieńnia ankiet, heta moža vyklikać niehatyŭnuju reakcyju z boku ludziej i pryvieści da skažeńnia źviestak. My pravodzim heta dobraachvotnaje abśledavańnie ŭ statystyčnych metach», — padkreśliŭ Vital Kulaševič.
Jon adznačyŭ, što ŭ chodzie abśledavańnia płanujecca acanić abjom niearhanizavanaha ŭvozu i vyvazu tavaraŭ fizičnymi asobami i nakiravanaść patokaŭ mižnarodnaha turyzmu.
«My bačym razychodžańni pamiž kredytavymi i debietavymi apieracyjami płaciežnaha bałansu. U 2013—2014 hadach razychodžańnie nasiła admoŭny charaktar i śviedčyła ab tym, što my nie možam paćvierdzić, kudy iduć hrašovyja srodki z krainy i na što byli patračanyja», — kanstatavaŭ Kulaševič.
Miarkujecca, dadaŭ jon, što takija razychodžańni abumoŭlenyja pieramiaščeńniem tavaraŭ praź dziaržaŭnuju miažu, jakija mytnaje zakanadaŭstva nie patrabuje dekłaravać.
Vybaračnyja abśledavańni hramadzian na miažy, adznačyŭ pradstaŭnik statkamiteta, jakija dazvalajuć acanić abjomy niearhanizavanaha ŭvozu i vyvazu tavaraŭ fizičnymi asobami, i raniej pravodzilisia ŭ Kazachstanie, Polščy, a taksama ŭ Biełarusi (u vieraśni 2013 hoda).
Abśledavańnie budzie pravodzicca ŭ siami aŭtadarožnych punktach propusku na miažy Biełarusi 10 i 11 krasavika.
«U budučyni, mahčyma, buduć abśledavacca hramadzianie, jakija pieramiaščajucca čyhunačnym, pavietranym transpartam. Mahčyma, budziem znachodzić mahčymaść abśledavać hramadzian, jakija vyjazdžajuć u Rasijskuju Fiederacyju, ź jakoj u nas adsutničaje miaža», — adznačyŭ Vital Kulaševič.
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury4
Kamientary