Абследаванне фізічных асоб у аўтадарожных пунктах пропуску на дзяржаўнай мяжы Беларусі будзе добраахвотным, паведаміў 8 красавіка на брыфінгу ў Мінску начальнік галоўнага ўпраўлення статыстыкі знешняга гандлю Нацыянальнага статыстычнага камітэта Беларусі Віталь Куляшэвіч.
«Абследаванне будзе добраахвотным і ананімным. Калі мы будзем прымушаць людзей да абавязковага запаўнення анкет, гэта можа выклікаць негатыўную рэакцыю з боку людзей і прывесці да скажэння звестак. Мы праводзім гэта добраахвотнае абследаванне ў статыстычных мэтах», — падкрэсліў Віталь Куляшэвіч.
Ён адзначыў, што ў ходзе абследавання плануецца ацаніць аб'ём неарганізаванага ўвозу і вывазу тавараў фізічнымі асобамі і накіраванасць патокаў міжнароднага турызму.
«Мы бачым разыходжанні паміж крэдытавымі і дэбетавымі аперацыямі плацежнага балансу. У 2013—2014 гадах разыходжанне насіла адмоўны характар і сведчыла аб тым, што мы не можам пацвердзіць, куды ідуць грашовыя сродкі з краіны і на што былі патрачаныя», — канстатаваў Куляшэвіч.
Мяркуецца, дадаў ён, што такія разыходжанні абумоўленыя перамяшчэннем тавараў праз дзяржаўную мяжу, якія мытнае заканадаўства не патрабуе дэклараваць.
Выбарачныя абследаванні грамадзян на мяжы, адзначыў прадстаўнік статкамітэта, якія дазваляюць ацаніць аб'ёмы неарганізаванага ўвозу і вывазу тавараў фізічнымі асобамі, і раней праводзіліся ў Казахстане, Польшчы, а таксама ў Беларусі (у верасні 2013 года).
Абследаванне будзе праводзіцца ў сямі аўтадарожных пунктах пропуску на мяжы Беларусі 10 і 11 красавіка.
«У будучыні, магчыма, будуць абследавацца грамадзяне, якія перамяшчаюцца чыгуначным, паветраным транспартам. Магчыма, будзем знаходзіць магчымасць абследаваць грамадзян, якія выязджаюць у Расійскую Федэрацыю, з якой у нас адсутнічае мяжа», — адзначыў Віталь Куляшэвіч.
Цяпер чытаюць
65‑гадовага гамельчука асудзілі за спробу дыверсіі на чыгунцы і здраду дзяржаве. Што вядома?2
Каментары