Ihar Kuźniacoŭ: A linija Stalina — heta nie falsifikacyja historyi?

U kamientary Jeŭraradyjo historyk nazvaŭ zajavu namieśnika staršyni Minharvykankama Ihara Karpienki biezadkaznaj.

Pavialičyć

Namieśnik staršyni Minharvykankama i pieršy sakratar Kamunistyčnaj partyi Biełarusi Ihar Karpienka zajaviŭ, što za falsifikacyju historyi Druhoj suśvietnaj i Vialikaj Ajčynnaj vajny varta ŭvieści kryminalnuju adkaznaść. Pa jaho słovach, nielha dapuścić, kab histaryčnyja fakty pierakručvali, nadavali im afarboŭku, čužuju dla bolšaści biełarusaŭ.

Historyk Ihar Kuźniacoŭ, da jakoha źviarnułasia Jeŭraradyjo, nie zmoh pryhadać, chto ŭ Biełarusi falsifikuje vyniki Druhoj suśvietnaj i Vialikaj Ajčynnaj vajny. Historyk kaža, kancepcyja historyi ŭ školnych padručnikach jaho pakaleńnia i siońniašnich praktyčna ničym nie adroźnivajecca. I kali niechta z daśledčykaŭ vychodzić za jaje miežy, pačynajecca abvinavačvańnie ŭ falsifikacyi. U kožnym razie, miarkuje Kuźniacoŭ, rabić padobnyja zajavy ŭ XXI stahodździ biezadkazna:

Kuźniacoŭ: «Falsifikacyja — heta zaviedama naŭmysnaje skažeńnie. Kali čałaviek piša pra toje, što ŭ partyzanskim atradzie pobač ź biezumoŭnym hieraizmam byli vypadki maradziorstva — heta falsifikacyja? Novyja fakty ŭvodziacca ŭ navukovy abarot — było i toje, i hetaje. Ale zhodna z našaj madellu heta nie musić ahučvacca ni na jakim ŭzroŭni. A «linija Stalina» — heta što, nie falsifikacyja historyi? Tak davajcie tady budziem pryciahvać da adkaznaści ŭsich, chto skažaje fakty».

Pa słovach Kuźniacova, historyja, jak źjava, nie moža prachodzić praź jurydyčnyja pracedury — dla hetaha jość navukovyja simpoziumy, abmierkavańni ŭ navukovych kołach i hramadstvie. Praŭda, narakaje historyk, navukovaja dumka ciapier zahnanaja ŭ tupik. Apošnim časam u Biełarusi nie abaroniena nivodnaja dysiertacyja, źviazanaja z prablemami vajenapałonnych. Naprykład, ciaham troch hadoŭ VAK nie zaćviardžała abaronienuju doktarskuju dysiertacyju Alaksieja Litvina na temu vajskova-palicejskich farmavańniaŭ na terytoryi Biełarusi ŭ hady vajny:

Kuźniacoŭ: «Tam nie było ničoha, aproč faktaŭ, kštałtu, voś byli palicejskija bataljony, jany vykonvali takija funkcyi — ničoha nie było inšaha. Ale hetaha chapiła, kab try hady dysiertacyju niekalki razoŭ karektavali. I jon jaje abaraniaŭ u tym vyhladzie, jaki zadavoliŭ vieteranaŭ vajny i pracy. Ale jakoje dačynieńnie vieterany vajny i pracy majuć da vyšejšaj atestacyjnaj kamisii?»

Historyk pierakanany, što ŭsialaki jubilej, źviazany z Druhoj suśvietnaj vajnoj, u sučasnym śviecie musić supravadžacca pamiaćciu pra zahinułych i ŭśviedamleńniem kryvavych urokaŭ. Maŭlaŭ, treba raspaviadać usiu praŭdu vajny, kab sučasnaje pakaleńnie razumieła, u jakich nievierahodnych umovach ludzi žyli, pracavali, zmahalisia, hinuli i vyžyli.

• 0
• 0
• 0
• 0
• 0
• 0
• 0
• 0