FK «Dynama» (Minsk) patrabuje prabačeńniaŭ za «nienaležnaje staŭleńnie» da zaŭziataraŭ u dzień hulni z «Niomanam»

Z pratestam suprać dziejańniaŭ pravaachoŭnych orhanaŭ u dačynieńni da zaŭziatiaraŭ vystupiŭ 14 krasavika futbolny kłub «Dynama» (Minsk).

11 krasavika ŭładalniki siezonnych abaniemientaŭ katehoryi Premium, u tym liku siemji ź dziećmi, nakiroŭvalisia ŭ Hrodna na matč pieršaha tura čempijanatu z «Niomanam» na śpiecyjalnych aŭtobusach. Vyjezd «byŭ azmročany nienaležnym staŭleńniem da zaŭziatiaraŭ «Dynama», paviedamlaje kłub.

Jak havorycca ŭ zajavie, pa nieviadomaj pryčynie supracoŭniki pravaachoŭnych orhanaŭ, jakija supravadžali zaŭziatiaraŭ, nie dazvolili aŭtobusam spyniacca kala punktaŭ prydarožnaha servisu. Prypynkaŭ było dva — u lesie. «Ab narmalnym charčavańni i hihijenie ŭ takich umovach havorki być nie mahło. Jak pryznavalisia mnohija zaŭziatiary: «Ja vyjšaŭ z domu ŭ 6.05 i narmalna pajeści zmoh tolki ŭ 15:00, paśla matču. Navošta ja budu tak ździekavacca sa svajho arhanizma? Ja lepš bolš ni na vyjezd nie pajedu, ni na futboł nie pajdu!» — adznačajuć u kłubie.

Kala siektara, vydzielenaha dla zaŭziatiaraŭ «Dynama» na stadyjonie CSK «Nioman», nie było punktaŭ charčavańnia. «Punkty hramadskaha charčavańnia (u dastatkovaj kolkaści) byli litaralna za 10 mietraŭ ad našaha siektara. 70 arhanizavanych zaŭziatiaraŭ «Dynama», jakija prahaładalisia ŭ darozie, mahli b zrabić dobruju vyručku ŭ punkcie prodažu, kali b dazvolili zaŭziatiaram prajści hetyja 10 mietraŭ. Nie dazvolili! Darečy, punkt 6.10.9. «Rehłamienta čempijanatu Respubliki Biełaruś pa futbole 2015 hoda» naŭprost patrabuje «zabiaśpiečyć dla zaŭziatiaraŭ kamandy haściej zonu svabodnaha pieramiaščeńnia, niepasredna sumiežnuju ź ich siektaram z abaviazkovaj najaŭnaściu ŭ joj prybiralniaŭ i punktaŭ hramadskaha charčavańnia», — padkreślivajecca ŭ zajavie.

Kali ž punkt charčavańnia sa źniešniaha boku turnikieta byŭ usio ž razhornuty, zaŭziatiaraŭ «Dynama», jakija ŭžo prajšli na siektar, da jaho nie vypuskali. Dapamahli zaŭziatiary, jakija prybyli ŭ Hrodna svaim chodam: pierad tym jak uvajści na siektar, jany kuplali vadu i ježu.

«Čyja złaja vola pazbaviła našych zaŭziatiaraŭ elemientarnaha kamfortu i pavažlivaha da siabie staŭleńnia? Prava nazyvacca ludźmi? Čym ža my tak pravinilisia i pierad kim, što, prykładajučy nieparaŭnalnyja ŭ našym čempijanacie namahańni pa papularyzacyi futboła, raźvićci abaniemientnaj prahramy, usialak pryciahvajučy zaŭziatiaraŭ na trybuny niachaj i staryčka-«Traktara», my tym nie mienš akazvajemsia biezabaronnymi, kali pravy našych zaŭziatiaraŭ parušajucca samym biespardonnym čynam?» — zadaje pytańnie FK «Dynama» (Minsk).

Kłub «zaklikaje ŭpaŭnavažanyja orhany i struktury, adkaznyja za supravadžeńnie zaŭziatiaraŭ «Dynama» na matč u Hrodna i za arhanizacyju matču «Nioman» — «Dynama» (Minsk) razabracca ŭ incydencie i prynieści prabačeńni zaŭziatiaram», a taksama «dać harantyi niedapuščalnaści padobnych incydentaŭ u budučyni».

• 0
• 0
• 0
• 0
• 0
• 0
• 0
• 0