Kali rasijanie zrazumieli, što śpiecnazaŭcy HRU patrapili ŭ pałon da ŭkrainskich vajskoŭcaŭ, to pasprabavali ich zabić. Pra heta ŭ Bruseli žurnalistam zajaviŭ ministr zamiežnych spraŭ Ukrainy Pavieł Klimkin, piša «Ukrainskaja praŭda».
Źjaŭleńnie rasijskich vajskoŭcaŭ va ŭkrainskim špitali kiraŭnik MZS prakamientavaŭ frazaj — «vyratavać ad svaich».
«Našy vajskoŭcy faktyčna ciahnuli ich na svaich plačach, kab vyratavać im žyćcio. Rasijanie, kali zrazumieli, što tyja ŭ našych rukach, sprabavali ich zabić. Heta vypadak za miežami razumieńnia», — padkreśliŭ jon.
Klimkin taksama dadaŭ, što dvoje rasijskich aficeraŭ sa śpiecyjalnaha hrupoŭki pierasiekli ŭkrainskuju miažu z kankretnaj metaj — ździejśnić terarystyčny akt na terytoryi Ukrainy. «I chaču padkreślić, što dla mianie heta nie tolki palityčny aśpiekt, ale i maralny», — dadaŭ kiraŭnik zamiežnaha viedamstva.
U toj ža čas pradstaŭnik SBU pa suviaziach sa ŚMI, były dypłamat Markijan Łubkiŭski naviedaŭ rasijskich vajskoŭcaŭ u špitali, pra što napisaŭ u svaim fejsbuku i źmiaściŭ śviežyja fota.
«Idu ź lakarni… Voś takija jany, pradstaŭniki «lehiendarnaha» rasijskaha śpiecnazu.. kapitan Jerafiejeŭ i siaržant Alaksandraŭ…
Spałochanyja, ździŭlenyja, vartyja žalu i biezdapamožnyja …
Tolki siaržantu daktary vyratavali nahu — ranicoj treba było b užo amputavać … Pieralivajuć kroŭ i płazmu…
Ciažka razabracca va ŭłasnych pačućciach — niejkaja sumieś nianaviści i lutaści, škadavańnia pa našych achviarach i navat čałaviečaj miłasernaści …
Pasprabavaŭ datelefanavacca da rodnych Alaksandrava — telefony maŭčać. I Rasija maŭčyć…».
Rasija admaŭlaje pałon svaich vajskoŭcaŭ. Ukraina zajaŭlaje, što śpiecnazaŭcy byli zachoplenyja ŭ pałon kala nasielenaha punkta Ščaście.
U paniadziełak pres-sakratar prezidenta Rasii Dźmitryj Piaskoŭ zajaviŭ, što Kreml nie maje namieru praviarać čutki ab zatrymańni rasijskich vajskoŭcaŭ na Danbasie. «Heta nie tema administracyi prezidenta. Hetaje pytańnie treba adrasavać nie da nas. Nieadnarazova kazałasia i nami, i ministerstvam abarony, što nijakich rasijskich vajskoŭcaŭ u Danbasie niama», — skazaŭ Piaskoŭ.
Ciapier čytajuć
U turmie pamior były supracoŭnik KDB Mikałaj Varapaj, asudžany za špijanaž na karyść Ukrainy3
Kamientary