«Ułada — heta jak škarpetki». Karatkievič dała pieršuju pres-kanfierencyju ŭ jakaści kandydata ANŁAJN
U Minsku na ofisie «Havary praŭdu» prajšła pres-kanfierencyja Taćciany Karatkievič — kandydata ŭ prezidenty na vybarach-2015.
Adkryŭ pres-kanfierencyju kiraŭnik vybarčaha štaba Taćciany Karatkievič Andrej Dźmitryjeŭ. Jon rezka raskrytykavaŭ ciapierašni stan spraŭ u krainie. «Jašče piać hadoŭ z Łukašenkam pastaviać ludziej na miažu vyžyvańnia».
Kamanda Karatkievič vystupaje za mirnyja pieramieny i maje namier damahčysia ich šlacham udziełu ŭ vybarach. Dźmitryjeŭ paabiacaŭ, što za čas pieradvybarnaj kampanii Karatkievič pabyvaje ŭ 50 haradach.
Taćciana Karatkievič u svaim ustupnym słovie vykazała ŭpeŭnienaść, što krainie patrebny novy lidar, novyja ludzi. «Chopić ahladvacca — treba iści napierad. I mienavita my možam być łakamatyvam pieramien».
«My doraha płacim za adsutnaść reform — stahnacyjaj i zaniapadam, — skazała Karatkievič. — Urad robić biazdumnyja kroki. Apošni ź ich — ukaz 666 ab abmiežavańni impartu. Navat numar u jaho djabalski», — adznačyła jana.
«Chopić dzialić hramadstva — na biełaruskamoŭnych i ruskamoŭnych, praŭładnych i apazicyju», — pierakanana Karatkievič.
Taćciana Karatkievič prapanuje stvarać umovy dla raźvićcia biznesu i stvaryć antykryzisny płan dla adstałych pradpryjemstvaŭ.
Karatkievič ličyć, što ŭłada nie vykonvaje sacyjalnyja harantyi. Jana źviarnuła ŭvahu na situacyju, kali ŭ cełym rehijonie niemahčyma znajści pracu z zarobkam, bolšym za 3 miljony rubloŭ. Na jaje dumku, heta nienarmalna.
«Ludzi mnie skardziacca, što niama raboty, dzieci źjazdžajuć, ale jany nie źviazvajuć heta z palitykaj, nie źviazvajuć ź biaździejańniem deputataŭ, jakich nibyta jany abirali. My ž chočam, kab nijakaja ŭłada nie mahła ihnaravać ludziej», — kaža Karatkievič.
U jakaści svajoj «metavaj aŭdytoryi» Karatkievič bačyć «adukavanych ludziej, jakija nie ahladvajucca nazad, jakija chočuć dobraj budučyni dla svaich dziaciej, heta ludzi, jakim nadakučyŭ adzin i toj ža tvar».
«Nam treba zabiaśpiečyć hodny ŭzrovień adukacyi na ŭsich uzroŭniach, treba pieravučyć usich čynoŭnikaŭ — heta budzie šturšok dla raźvićcia krainy, treba refarmavać usiu madel kiravańnia», — miarkuje Karatkievič.
«My nie źbirajemsia vyhaniać čynoŭnikoŭ, my chočam, kab zastalisia prafiesijanały, — kaža Karatkievič, — my chočam, kab va ŭradzie pracavali i prafiesijanały z demakratyčnych sił, kab viarnulisia ludzi z zamiežža».
Karatkievič śćviardžaje, što Biełaruś pavinna być mirnaj krainaj i tut nie pavinna być vajskovych baz inšych krain. U vypadku svajho prychodu da ŭłady jana abiacaje da 2020 hoda vyvieści ź Biełarusi ŭsie rasijskija vajskovyja abjekty.
Karatkievič vykazałasia i pra zakliki da bajkotu vybarčaj kampanii: «Kali my zrobim heta, to vymušany budziem syści z palityki praz svaju niamohłaść».
Jana paŭtaryła svaju dumku, vykazanuju ŭ časie rehistracyi kandydataŭ: ułada pavinna źmianiacca. «Ułada — heta jak škarpetki. Čym čaściej ty ich mianiaješ, tym jany čyściejšyja», — skazała Karatkievič.
Karespandent ahienctva «Błumbierh» spytaŭsia ŭ Taćciany Karatkievič, ci prymie jana pasadu ad Łukašenki, kali jon joj prapanuje paśla vybaraŭ. «Jašče nikoli nie było takoha, kab demakratyčnym kandydatam prapanoŭvali pasady, — adkazała Karatkievič. — Ale kali tak zdarycca, to budziem raicca», — adkazała jana.
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary