«My kanstatujem, što skryni dla daterminovaha hałasavańnia źjaŭlajucca absalutna nie abaronienymi ad falsifikacyj», — zajaviŭ adzin z kaardynataraŭ kampanii nazirańnia «Prava vybaru — 2015» Dzianis Sadoŭski 10 kastryčnika na pres-kanfierencyi ŭ Minsku.
«Našy naziralniki kožny dzień pa 100—150 skarhaŭ pišuć tolki na toje, što ŭ abied abo nočču pamiaškańni, dzie znachodziacca skryni, nie apiačatvajucca. U bolšaści svajoj u pamiaškańni znachodzicca milicyjanier, jaki źjaŭlajecca asobaj padniavolnaj», — skazaŭ jon.
Sadoŭski taksama paviedamiŭ, što naziralniki kampanii fiksujuć «masavaje prymušeńnie» da daterminovaha hałasavańnia. «Heta fiksujecca amal usiudy, dzie takoje prymušeńnie možna arhanizavać. Faktyčna mabilizujecca ŭvieś administracyjny resurs dla akazańnia takoha nacisku na hramadzian. Usich, kaho možna mabilizavać na daterminovaje hałasavańnie (kaho — pahrozami, kaho — zadobryvańniem abo abiacańniami), zahaniajuć na vybarčyja ŭčastki. Takija fakty fiksujucca dziasiatkami abo navat sotniami», — adznačyŭ jon.
Taksama Sadoŭski paviedamiŭ ab manipulacyjach ź jaŭkaj vybarščykaŭ. «Heta my ŭ mienšaj stupieni fiksujem na ŭčastkach, dzie pravodzim nazirańnie. Pa takich učastkach razychodžańnie pamiž źviestkami, jakija dajuć našy naziralniki, i źviestkami kamisij, składajuć pa krainie ŭ siarednim 5%, u Minsku — 9%, — skazaŭ jon. — Ale na susiednich učastkach, dzie našych naziralnikaŭ niama, jaŭka zaškalvaje. Tam ułady nie sprabujuć arhanizavać navat bačnaść prychodu ludziej na ŭčastki, a prosta prypisvajuć nieabchodnuju ličbu, jakuju im spuskajuć źvierchu. Jaŭka na takich učastkach u paraŭnańni ź jaŭkaj na ŭčastkach, dzie my nazirajem, razychodzicca prykładna na čverć».
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1010
Kamientary