Minsielhascharč inicyjavała novaje padvyšeńnie zakupačnych cenaŭ. Hetym razam na pradukcyju raślinavodztva i adrazu na 50 %. Ministerstva ekanomiki pahadžajecca na 20 %.
Adpaviedny dakument z prapanovaj pavysić zakupačnyja ceny na pradukcyju raślinavodztva na 50 % Minsielhascharču dasłała na razhladu Ministerstva ekanomiki. Pa słovach namieśnika ministra sielskaj haspadarki i charču Vasila Paŭłoŭskaha, Minekanomiki paličyła metazhodnym padniać zakupačnyja ceny tolki na 20 %. Nieabchodnaść pavyšeńnia cenaŭ abhruntoŭvajecca, jak i ŭ vypadku z cenami na pradukcyju žyviołahadoŭli, apieradžalnym rostam zakupačnych cenaŭ u susiednich krainach, a taksama rostam vytvorčych vydatkaŭ. Pavodle namieśnika ministra, roźnica składaje 1,5—2 razy. Varta nahadać, što papiaredniuju prośbu Minsielhascharču pra pavyšeńnie zakupačnych i najvyšejšych adpusknych cenaŭ na hatovuju pradukcyju žyviołahadoŭli Ministerstva ekanomiki padtrymała. Z 25 lutaha pavyšanyja zakupačnyja ceny: na małako na 10 %, jałavičynu i śvininu — na 5 %, tłustuju śvininu — na 3 %. Najvyšejšyja adpusknyja ceny na hatovuju pradukcyju buduć raści na 1,5—2 % štomiesiac.
Pa słovach namieśnika ministra sielskaj haspadarki i charčavańnia Michaiła Savieljeva, hetaja miera dapamoža tolki častkova kampensavać vydatki žyviołahadoŭčaj haliny: u vyniku rostu zakupačnych i roźničnych cenaŭ ciaham hodu dadatkovy prybytak składzie kala Br310 młrd. pry ahulnym deficycie srodkaŭ na raźvićcio APK zvyš Br1,1 trłn. Źviazana heta z rostam cenaŭ na paliva, techniku i mineralnyja ŭhnajeńni.
Nia hledziačy na ščodraje finansavańnie sielskaj haspadarki, vytvorčaść u hetaj halinie na 70% stratnaja, pryznaŭ na pasiedžańni Savietu ministraŭ namieśnik kiraŭnika Administracyi prezydenta Alaksandar Papkoŭ.
Ciapier čytajuć
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie9
Kamientary