«Dziejasłoŭ» apublikavaŭ nieviadomy tvor Vasila Bykava, jak ź im zmahaŭsia KDB

24 lutaha ŭ kniharni «Halijafy» adbudziecca prezentacyja nieviadomaha tvoru Vasila Bykava — apaviadańnia «U tuju viasnu…» Rukapis pieradała ŭ časopis «Dziejasłoŭ» udava narodnaha piśmieńnika Iryna Michajłaŭna Bykava.

Hałoŭny redaktar «Dziejasłovu», staršynia Sajuzu biełaruskich piśmieńnikaŭ Barys Piatrovič, apavioŭ, što rukapis byŭ biaz nazvy:

«Na im čyjojści rukoj, mažliva, i samoha Bykava, była tolki paznačanaja data: «89 h.». Raspovied u tekście vioŭsia ad samoha hieroja, pryčym vielmi ščyra, asabista, i možna było padumać, što heta byŭ pieršy padychod Vasila Ŭładzimieraviča da napisańnia bijahrafičnych uspaminaŭ, jakija stali potym knihaj «Doŭhaja daroha dadomu».

U 2000-ja hady «Dziejasłoŭ» rehularna drukavaŭ spadčynu Vasila Bykava. Asabliva hety praces aktyvizavaŭsia ŭ časie padrychtoŭki zboru tvoraŭ klasyka ŭ 14 tamach. Da hetaha momantu ličyłasia, što ŭsia napisanaja Bykavym proza apublikavanaja. Ale znajšoŭsia jašče adzin tvor — apovied «U tuju viasnu…», jaki apublikavany ŭ № 80 «Dziejasłova».

Asnovaj apaviadańnia źjaŭlajecca raskaz vypadkova sustretaha hierojem haradzienskaha kadebista. Znachodziačysia za paru krokaŭ ad śmierci, kadebist vyrašaje davierycca sanatornamu znajomcu i apavieści pra svajo kolišniaje zmahańnie z haradzienskimi dysydentami Alaksiejem Karpiukom i Vasilom Bykavym.

Apublikavanaje ŭ «Dziejasłovie» apaviadańnie stvarałasia padčas pierabudovy, kali Vasil Bykaŭ jašče nie pačynaŭ zadumvacca pra napisańnie memuaraŭ. Mahčyma, piśmieńnik chacieŭ zrabić zabaronienyja staronki svajoj haradzienskaj bijahrafii asnovaj dla mastackaha tvoru. Ale štości spyniła Bykava na paŭdarozie, miarkuje Barys Piatrovič.

«Vielmi škada, što Vasil Uładzimieravič, pačaŭšy pisać hety tekst jašče ŭ 1989 hodzie, tak da jaho bolš i nie viarnuŭsia, nia skončyŭ, — adznačaje Barys Piatrovič. — Cikava, što jašče raskazaŭ jamu toj «supracoŭnik» i jakija byli jahonyja kamentary. I ŭva što potym, paśla dapracoŭki, pieratvaryŭsia b hety zapis: u mastacki tvor ci ŭsio ž pieramahła b dakumentalnaść? Pa vialikim rachunku, siońnia ŭžo heta niavažna. «Dziejasłoŭ» drukuje tekst biaź źmienaŭ, u takim vyhladzie i pravapisie, jak napisaŭ jaho Vasil Uładzimieravič. I sprava daśledčykaŭ-litaraturaznaŭcaŭ rabić vysnovy, što heta jość i što mahło b być».

Śviežy numar časopisa «Dziejasłoŭ» ź nieviadomym apaviadańniem Vasila Bykava budzie prezentavany padčas uručeńnia tradycyjnaj «dziejasłoŭskaj» litaraturnaj premii «Załaty apostraf» u kniharni «Halijafy» 24 lutaha. Pačatak imprezy — a 19-j hadzinie.

• 0
• 0
• 0
• 0
• 0
• 0
• 0
• 0