BNF płanuje vyłučyć bolš za 50 kandydataŭ na vybary ŭ Pałatu pradstaŭnikoŭ

Padčas sustrečy ŭ minułyja vychodnyja budučyja kandydaty ad BNF abmierkavali taktyku partyi na vybarach, prajekt partyjnaj pieradvybarčaj platformy, jurydyčnyja i techničnyja aspekty vybaraŭ, a taksama aznajomilisia z pazytyŭnym dośviedam praviadzieńnia paśpiachovych frontaŭskich kampanijaŭ u časie minułych vybaraŭ.

Staršynia Partyi BNF Alaksiej Janukievič zajaviŭ, što niahledziačy na naładžvańnie stasunkaŭ Łukašenki z Zachadam, umovy praviadzieńnia vybarčaj kampanii zastanucca niaźmiennymi. Vynikovy skład parlamentu budzie sfarmavany administratyŭnym čynam, niezaležna ad vynikaŭ hałasavańnia. Jon nazvaŭ spekulacyjami spadzievy asobnych palitykaŭ na toje, što «kahości z apazycyi ŭ pałatku prapuściać, kab spadabacca Zachadu»:

«Ułady ni ŭ jakim razie nie dapuściać u parlament palityčnuju apazycyju, jakaja budzie alternatyvaj siońniašniamu aŭtarytarnamu režymu. Možna čakać, što ŭ Pałacie pradstaŭnikoŭ z łaski ŭładaŭ moža apynucca chtości z adekvatnych ekanamistaŭ sa zdarovymi dumkami nakont refarmavańnia narodnaj haspadarki, ale tudy ŭłady dakładna nie prapuściać tych, chto budzie kazać pra palityku. My, Partyja BNF, mienavita pra palityku na hetych vybarach i budziem kazać, my budziem prezentavać sabie jak palityčnuju alternatyvu hetamu režymu», — zajaviŭ Alaksiej Janukievič.

Asnoŭnymi pasyłami Partyi BNF u ahitacyjnaj kampanii buduć lozunhi pra nacyjanalnaje adradžeńnie, abaronu niezaležnaści ŭ ekanamičnym, palityčnym, vajskovym, humanitarnym vymiareńni, supraćdziejańnie eŭrazijskaj intehracyi i sadziejničańnie ekanamičnym reformam.

Jak adznačyŭ pradstaŭnik vybarčaha štabu Partyi BNF Jury Čavusaŭ, budučyja vybary buduć pieršymi vybarami parlamentu, jakija projduć pa abnoŭlenaj redakcyi Vybarčaha kodeksu. U 2013 hodzie ŭ jaho ŭnieśli značnyja źmieny: ahitacyjnaja kampanija budzie adbyvacca zusim bieź dziaržaŭnaha finansavańnia, tolki za košt sabranych kandydatami vybarčych fondaŭ, u kandydataŭ ad partyi źjavicca mahčymaść mieć svaich pradstaŭnikoŭ u akruhovych vybarčych kamisijach z pravam daradčaha hołasu (ale ŭ CVK svajho pradstaŭnika partyja nakiravać bolš nia maje prava), uvodzicca ŭzrovień abłasnych kamisijaŭ.

Vybary deputataŭ Pałaty pradstaŭnikoŭ šostaha sklikańnia pavinny adbycca nie paźniej za vierasień 2016 hodu, najbolš vierahodnaj dataj praviadzieńnia vybaraŭ źjaŭlajecca 11 vieraśnia.

• 0
• 0
• 0
• 0
• 0
• 0
• 0
• 0