U Bahušeŭskaj abłasnoj suchotnaj lakarni (haradski pasiołak Bahušeŭsk), što ŭ Sieńnienskim rajonie na Viciebščynie, usčaŭsia bunt.
Pacyjenty niezadavolenyja ŭmovami znachodžańnia tut i abychodžańniem ź imi miedpiersanału lakarni, u jakoj na 320 miescaŭ — 500 chvorych, pryčym u adździaleńni, dzie z 78 čałaviek — 24 žančyny, a astatnija mužčyny, majucca tolki adna vanna i adzin duš, jakimi da taho ž amal niemahčyma karystacca.
Pry antysanitarnych umovach i niščymnaj ježy za hod u lakarni pamierli 67 čałaviek. Na siońniašni dzień 100 čałaviek — 70 mužčyn i 30 žančyn, psichična chvoryja dy infikavanyja pałačkaj Kocha, utrymlivajucca ŭ lakarni za kratami i nie majuć nijakaha dohladu. Hetyja 100 čałaviek užo abviaścili haładoŭku, astatnija mohuć dałučycca ŭ luby momant.
Najbolš aktyŭnych, chto adkryta vykazvaje niezadavalnieńnie, vypisvajuć. Tak, 19 traŭnia z adkrytaj formaj suchotaŭ vypisali Natallu Drabyšeŭskuju.
Pavodle jaje słoŭ, «u pałatach pa padłozie, ścienach i łožkach biehajuć pacuki z prusakami. Nočču davodzicca nakryvacca z hałavoj — chavacca ad ich. A kiraŭnictva lakarni nie źviartaje na heta nijakaj uvahi».
Žančynu, jakaja maje dvaich niepoŭnahadovych dziaciej i stvaraje pahrozu dla zdaroŭja inšych ludziej, vypisali nasupierak pravavym i miedyčnym normam. Natalla Drabyšeŭskaja navažanaja pisać skarhu ŭ abłasnuju prakuraturu i ŭpraŭleńnie achovy zdaroŭja. U chutkim časie za joj pojduć inšyja chvoryja Bahušeŭskaj suchotnaj lakarni.
Nahadajem, što na pačatku hoda haładavali 150 suchotnikaŭ Navajelenskaj lakarni, što ŭ Dziatłaŭskim rajonie Hrodzienskaj vobłaści.
Ciapier čytajuć
Łukašenka zaklikaŭ žycharoŭ Homielščyny nie chvalavacca z-za ŭltymatumu Zialenskaha adnosna retranślataraŭ48
Kamientary