Minkult abiacaje dbajna praviarać źmiest rekłamnych ščytoŭ na pamyłki

Ministerstva kultury budzie nadavać bolš uvahi idei, źmiestu i vykanańniu sacyjalnaj rekłamy, jakaja ŭzhadniajecca z hetym dziaržaŭnym orhanam. Takim čynam na pres-kanfierencyi 11 žniŭnia ŭ Minsku namieśnik ministra kultury Iryna Dryha prakamientavała skandalny płakat z mnostvam pamyłak na adnym z rekłamnych ščytoŭ u stalicy, pryśviečany Hodu kultury ŭ Biełarusi.

Pavialičyć

U pačatku žniŭnia ŭ ŚMI źjavilisia fatahrafii biłborda na skryžavańni staličnych vulic Pieršamajskaj i Pulichava. Na płakacie była vyjava Nacyjanalnaj biblijateki, a taksama pomnika biełaruskamu pieršadrukaru Francysku Skarynu. Płakat supravadžaŭsia tekstam na biełaruskaj movie, u jakim byli dapuščanyja čatyry hramatyčnyja, arfahrafičnyja i punktuacyjnyja pamyłki, a taksama adna faktałahičnaja: Skaryna byŭ nazvany hramadskim dziejačam XV, a nie XVI stahodździa. Na pradpryjemstvie «Minskrekłama» žurnalistam zajavili, što eskiz płakata raspracoŭvali ŭ Ministerstvie kultury. Paśla skandalny płakat byŭ zamienieny na patryjatyčnuju rekłamu.

«Pry ŭzhadnieńni sacyjalnaj rekłamy (kali jana ŭzhadniajecca ź Ministerstvam kultury), zrazumieła, što my jašče bolš uvahi budziem nadavać nie tolki dobraj idei, ale i jaje adpaviednamu ŭvasableńniu», — skazała Dryha.

Jana padkreśliła važnaść hodnaj realizacyi prajektaŭ, nakiravanych na «prapahandu biełaruskaj kultury, litaratury, tradycyj, u tym liku biełaruskaj movy».

«Kali ŭsiamu hetamu budzie nadavacca takaja ŭvaha, to jašče bolš šyroka buduć raspaŭsiudžvacca kulturałahičnyja viedy i takich, skažam, niedarečnaściaŭ, bolš nie budzie. Tym bolš što ŭ nastupnym hodzie budzie jubilej biełaruskaha knihadrukavańnia, — zajaviła čynoŭnica. — Ja dumaju, što ŭvaha da asoby Francyska Skaryny, da historyi biełaruskaha knihadrukavańnia ŭ cełym budzie bolš pilnaj».

«I my, i miascovyja ŭłady, i našy arhanizacyi kultury zrobim usio, kab infarmacyja padavałasia dakładna i z boku źmiestu, kab nie było źmiastoŭnych pamyłak, i z boku formy, u tym liku ŭžyvańnia normaŭ sučasnaj biełaruskaj litaraturnaj movy», — zajaviła namieśnik ministra kultury.

U toj čas jak Dryha pierakonvała presu, što ministerstva budzie bolš dbajna sačyć za jakaściu sacyjalnaj rekłamy, žurnalisty vyjavili čarhovy skandalny płakat na vulicach stalicy. Na biłbordzie, ustanoŭlenym na vulicy Lenina niedaloka ad Minskaha zavoda imia Kastryčnickaj revalucyi, visić rekłama partała museums.by i płaciežnaj sistemy «Biełkart». Na płakacie z pamyłkami napisana: «Lubiš svoju krainu — dałučajsia», nižej ukazany aŭtar rekłamy — Ministerstva kultury Respubliki Biełaruś.

U mai hetaha hoda karystalniki sacyjalnych sietak vyjavili surjoznuju pamyłku na biłbordzie na vulicy Jakuba Kołasa ŭ Hrodnie. Jon byŭ vyrableny da XI Respublikanskaha fiestyvalu nacyjanalnych kultur. Na płakacie pryvodziłasia kołasaŭskaja cytata: «Nijakaje bahaćcie ludziej nie byvaje daražejšym za ich rodnuju movu». Pry hetym na płakacie byŭ partret inšaha kłasika biełaruskaj litaratury — Janki Kupały.

Paśla hetu situacyju prakamientavaŭ namieśnik ministra kultury Vasil Černik: «Viadoma, heta drenna. Drenna, naturalna. Što možna skazać? Bolš uvažlivymi treba być, hladzieć, što vy da biłborda [macujecie]. Heta vielmi surjoznaje pytańnie, viadoma, drenna heta. Nu, žyćcio naša takoje. Ja ŭsio dobra razumieju, nu, atrymałasia tak. Budzie ŭrok. Dumaju, adpaviednyja vysnovy kiraŭnictva Hrodzienskaha abłvykankama zrobić pa hetym pytańni».

• 0
• 0
• 0
• 0
• 0
• 0
• 0
• 0