Statkievič u dzień svajho 60-hodździa: Pakul jość siły i enierhija, budu zmahacca za paśpiachovuju jeŭrapiejskuju i biełaruskuju Biełaruś

«Ja asabliva nie zamaročvajusia ŭsialakimi śviatami, a dzień naradžeńnia — heta taki dzień, kali tabie jurydyčna stanovicca na hod bolš, — skazaŭ Statkievič BiełaPAN. — Adnak apošni raz ja moh sa svaimi blizkimi sustreć dzień naradžeńnia ŭ 2010 hodzie. Tak što ciapier heta, napeŭna, bolš mahčymaść sustrecca z tymi ludźmi, jakich chacieŭ by ŭbačyć».

Pavodle słoŭ Statkieviča, pakul u jaho jość siły i enierhija, jon maje namier vydatkoŭvać ich na važnuju dla jaho spravu — «narmalnaja paśpiachovaja jeŭrapiejskaja i biełaruskaja Biełaruś».

«Na žal, ułady svaim žadańniem zachavać siabie i svaje pasady zaviali našu krainu ŭ tupik. Nam chutka, mahčyma, daviadziecca prosta zmahacca za samazachavańnie Biełarusi jak dziaržavy, bo, pieratvaryŭšy krainu ŭ niejkaha parazita pry Rasii, spadziejučysia niešta sabie zabiaśpiečyć, Łukašenka pastaviŭ nas u vielmi składanuju situacyju, — miarkuje Statkievič, — Jaho chvaravitaje imknieńnie zachavać uładu zahnała nas u tupik, i ciapier navat da jaho heta dajšło, što Rasija za ŭsio mienšyja hrošy budzie patrabavać usio bolš i bolš. U rešcie rešt zapatrabuje ŭsiu našu krainu».

Statkievič taksama adznačyŭ: «U kulturnym płanie, što zroblena pa źniščeńni našych kulturnych kaštoŭnaściaŭ i našaj movy, — heta ŭžo nižej za plintus. A heta adna z asnoŭ achovy biaśpieki našaj dziaržavy. Vialiki kałhas u ekanomicy, kali žadańnie ŭsim kiravać i zabiaśpiečvać sabie palityčnuju ŭładu zabili na korani pryvatnuju inicyjatyvu. Tak što sumavać mnie nie daviadziecca. Ja liču siabie biełarusam, adnošu siabie da biełaruskaj nacyi, u mianie jość pačućcio adkaznaści za los našaj nacyi i krainy, i heta dla mianie adzin z samych mocnych matyvaŭ va ŭsim, što ja rablu. Pakul budu žyvy, budu staracca niešta rabić dla Biełarusi».

Mikałaj Statkievič naradziŭsia ŭ Słuckim rajonie Minskaj vobłaści. Skončyŭ Minskaje vyšejšaje inžyniernaje zienitnaje rakietnaje vučylišča supraćpavietranaj abarony (1978). Kandydat techničnych navuk (1986). Vučyŭsia ŭ daktarantury (1990—1993). Stvaralnik i kiraŭnik hramadskaha abjadnańnia «Biełaruskaje zhurtavańnie vajskoŭcaŭ» (1991—1995).

Z 1995 hoda ŭznačalvaŭ Biełaruskuju sacyjał-demakratyčnuju partyju (Narodnaja Hramada). U kancy 2004 hoda ŭ partyi zdaryŭsia raskoł, i ŭ studzieni 2005-ha Miniust pryznaŭ fakt vyklučeńnia Statkieviča z partyi. U 2005 hodzie Statkievič zajaviŭ pra namier znoŭ zasnavać BSDP (Narodnaja Hramada).

U mai 2005 hoda palityk byŭ pryhavorany da troch hadoŭ abmiežavańnia voli za arhanizacyju 18—19 kastryčnika 2004 hoda ŭ Minsku vuličnaj akcyi suprać aficyjnych vynikaŭ parłamienckich vybaraŭ i refierendumu. Pakarańnie adbyvaŭ u Baranavičach Bresckaj vobłaści i vioscy Błoń Puchavickaha rajona Minskaj vobłaści.

U mai 2011-ha sud Leninskaha rajona Minska pryhavaryŭ Statkieviča da šaści hadoŭ pazbaŭleńnia voli, pryznaŭšy jaho vinavatym u arhanizacyi masavych biesparadkaŭ u dzień vybaraŭ prezidenta 19 śniežnia 2010 hoda. Mižnarodnyja arhanizacyi abviaścili jaho palityčnym viaźniem. Statkieviču nieadnarazova prapanoŭvali napisać prośbu ab pamiłavańni na imia Alaksandra Łukašenki, adnak asudžany palityk kateharyčna admaŭlaŭsia heta rabić.

Jon i jašče piaciora palitviaźniaŭ byli vyzvalenyja 22 žniŭnia 2015 hoda na padstavie rašeńnia kiraŭnika dziaržavy.

• 0
• 0
• 0
• 0
• 0
• 0
• 0
• 0