Tureckaja palicyja pravodzić pieratrusy adnačasova ŭ 44 kampanijach ŭ Stambule i vydała ordary na zatrymańnie 120 členaŭ ich kiraŭnictva, paviedamlaje tureckaje dziaržaŭnaje ahienctva Anadału.
Pieratrusy i zatrymańni prachodziać u ramkach rasśledavańnia sproby dziaržaŭnaha pieravarotu, jakaja adbyłasia ŭ Turcyi 15 lipienia. Čynoŭniki pakul nie paviedamili nazvy kampanij, dzie viaducca pieratrusy.
Paviedamlajecca, što kampanii padazrajucca ŭ finansavańni ruchu Fietchuły Hiulena — relihijnaha dziejača z ZŠA, jakoha tureckija ŭłady ličać natchnialnikam buntu.
Tureckija ŭłady pierakananyja, što prychilniki apazicyjaniera stvaryli ŭ Turcyi cieniavyja struktury — tak zvanuju paralelnuju dziaržavu. Sam Hiulen, jaki kaliści byŭ paplečnikam Erdahana, admaŭlaje abvinavačvańni ŭ padtrymcy buntu.
***
Paśla sproby dziaržaŭnaha pieravarotu tureckija ŭłady pačali maštabnyja čystki: bolš za 35 tysiač čałaviek byli zatrymanyja, ź ich 17 tysiač - aficyjna aryštavanyja.
Bolš za 80 tysiač čałaviek, siarod jakich vajskoŭcy, sudździ, dekany i vykładčyki univiersitetaŭ, žurnalisty pazbavilisia svaich pasadaŭ z-za padazreńniaŭ u padtrymcy Hiulena. Byli začynienyja bolš za dźvie tysiačy arhanizacyj.
Kamientary