Valancin Stefanovič: U vybarach udzielničajuć partyi-fantomy

CVK adabraŭ u vybarčyja kamisii svaich ludziej ź niaisnych partyj. Pra heta ŭ intervju charter97.org zajaviŭ namieśnik staršyni Pravaabarončaha centra «Viasna» Valancin Stefanovič.

Pavialičyć

— Na budučych «vybarach» u «pałatku» hałasy biełarusaŭ buduć ličyć ludzi z partyj-fantomaŭ. Niadaŭna žurnalist prajšoŭsia pa jurydyčnych adrasach takich abjadnańniaŭ, jak «Biełaruskaja ahrarnaja partyja», «Partyja pracy i spraviadlivaści» i «Sacyjalna-spartyŭnaja partyja» i vyjaviŭ, što pra mnohich z partyj infarmacyi niama naohuł, a niekatoryja i zusim nie ŭdałosia znajści pa ŭkazanych adrasach.

— U mianie daŭno była takaja ideja — paprasić žurnalistaŭ adšukać ich ofisy. Jość, da prykładu, takaja cudoŭnaja partyja, jakaja nazyvajecca Sacyjalna-spartyŭnaj. My za jaje aktyŭnaściu daŭno sočym. I zaŭvažyli takuju reč, što ŭ čas «vybaraŭ» jana aktyŭna vyłučajecca ŭ skład vybarčych kamisij, a samich kandydataŭ u deputaty jana vyłučaje vielmi mała. Padčas sioletnich «parłamienckich vybaraŭ» jany nie vyłučyli naohuł nikoha. Atrymlivajecca dziŭnaja situacyja: partyja faktyčna nie ŭdzielničaje ŭ vybarach, ale ŭ mienskija kamisii vyłučyła 660 čałaviek! Ź ich 639 byli ŭklučanyja ŭ hetyja kamisii.

Dola ŭsich palityčnych partyj u kamisijach mizernaja. Heta adlustroŭvaje palityčnuju sistemu Biełarusi, kali asnoŭnymi arhanizatarami «vybaraŭ» vystupajuć hramadskija arhanizacyi, jakija nie mohuć vyłučać kandydataŭ pavodle zakona, a nie palityčnyja partyi, jakija pavinny być asnoŭnymi subjektami vybarčaha pracesu.

U nas tradycyjna piaciorka pradziaržaŭnych arhanizacyj źjaŭlajecca asnoŭnymi arhanizatarami «vybaraŭ». Ja maju na ŭvazie BRSM, «Biełuju Ruś», KPB, Biełaruski sajuz žančyn i Biełaruskaje hramadskaje abjadnańnie vieteranaŭ. Atrymlivajecca taki voś sielekcyjny vybarčy padychod.

Kali b ofisy apazicyjnych partyj składana było znajści, jany nie znachodzilisia pa miescy ich rehistracyi, to im by daŭno ŭžo vynieśli papiaredžańni abo likvidavali. Ja pamiataju vypadki, kali likvidavali partyi, ale na heta ŭsie zapluščvajuć vočy, bo patrebnyja takija voś partyi-arhanizatary «vybaraŭ». Ad apazicyjnych partyj u vybarčyja kamisii ŭvajšło tolki dziesiać adsotkaŭ ad vyłučanych pradstaŭnikoŭ, a ad dziaržaŭnych pryblizna 89. Heta značyć, bačny absalutna sielekcyjny i dyskryminacyjny padychod. Ja nie dumaju, što pradstaŭniki pradziaržaŭnych partyj značna lepš viedajuć vybarčaje zakanadaŭstva, čym pradstaŭniki apazicyjnych.

— Vy adznačyli, što situacyja z partyjami-fantomami supiarečyć zakonu.

— Hetaja situacyja nienarmalnaja tym, što patrabavańni zakona ab palityčnych partyjach adnolkavyja dla ŭsich. Navidavoku parušeńni. Jak takoje moža być, što partyju niemahčyma znajści pa miescy jaje jurydyčnaha adrasu? Heta źjaŭlajecca parušeńniem zakanadaŭstva, i rehistracyjny orhan pavinien na heta niejak reahavać. Tamu što, paŭtarusia, apazicyjnym partyjam adrazu ž vynosiać papiaredžańni, a dźvie partyi i zusim byli likvidavanyja.

Kali hetyja partyi niemahčyma znajści pa ich jurydyčnych adrasach, to strašna ŭjavić, što dziejecca ŭ ich rehijanalnych strukturach. Takija fakty kažuć pra toje, što rehistracyjnamu orhanu treba było b źviarnuć pilnuju ŭvahu i pahladzieć, što tam robicca, ci viadziecca adpaviednaja dakumientacyja, što heta za partyi i hetak dalej.

Ja, naprykład, pra mnohija partyi i nie čuŭ nikoli. Lidzija Jarmošyna śćviardžaje, što jany adbirajuć samych najlepšych pradstaŭnikoŭ u kamisii. Ja žyvu ŭ hetaj krainie z naradžeńnia, aktyŭnaj hramadzianskaj dziejnaściu zajmajusia dvaccaty hod, ale ja nikoli nie čuŭ pra niekatoryja partyi, pra ich palityčnuju płatformu, nie mahu nazvać nivodnaha ich pradstaŭnika, adnak jany pradstaŭlenyja ŭ kamisijach.

— Pradstaŭniki ABSIE ŭ kursie hetaj situacyi?

— My heta pakazvajem u svaich spravazdačach. Tradycyjna ŭličvajem i pakazvajem dyskryminavany padychod pry farmavańni ŭčastkovych kamisij. My ŭsio heta adlustravali ŭ hrafikach, usio heta nahladna vidać, tamu ABSIE, viadoma, u kursie, jany našyja spravazdačy čytajuć.

• 0
• 0
• 0
• 0
• 0
• 0
• 0
• 0