Reuters: Kaśpijskija radoviščy mohuć dadatkova źbić ceny na naftu ŭ bližejšaj budučyni
Zdabyča nafty pačniecca na dvuch novych radoviščach u Kaśpijskim mory ŭžo ŭ kancy 2016 hoda, piša ahienctva Reuters, spasyłajučysia na krynicy ŭ pramysłovaści i na atrymany žurnalistami raskład pastavak «čornaha zołata».
Kazachskaje Kašahanskaje radovišča i rasijskaje imia Fiłanoŭskaha razam dadaduć da suśvietnaha rynku jak minimum 200.000 baralaŭ nafty ŭ sutki ŭ hetym hodzie, a da kanca nastupnaha zdabyča pavialičycca prykładna da 500.000 baralaŭ.
Heta adpaviadaje prykładna 0,5% pastavak nafty ŭ śviecie.
Na hetym tydni Maskva i Saudaŭskaja Aravija damovilisia supracoŭničać dziela padtrymańnia cenaŭ na naftu i zajavili, što nie vyklučajuć u budučyni abmiežavańnia zdabyčy, što trochi pavysiła kaciroŭki enierhanośbita.
Taksama Iran praciahvaje pracu pa pavyšeńni svajoj zdabyčy nafty da 2,4 młn baralaŭ u sutki — prykładna stolki kraina pradavała na źniešnim rynku da taho, jak byli ŭviedzienyja mižnarodnyja sankcyi, metaj jakich było pakarać Tehieran za mahčymuju raspracoŭku atamnaj zbroi.
«Pakul Rasija raspaviadaje kazki pra toje, jak jana spynić pastaŭki, kab stabilizavać ceny, na jaje terytoryi i ŭ krainach SND pačynajuć pracavać novyja radoviščy, i naŭrad ci niechta moža spynić hety praces», — skazaŭ Reuters ananimny pradstaŭnik naftavaj haliny pramysłovaści.
Naftavyja hihanty ŭ Kazachstanie i RF hadami šukali i rychtavalisia da zdabyčy na novych radoviščach jašče ŭ pieryjad, kali prahnazavaŭsia vysoki rost cenaŭ na «čornaje załota». Ciapier kampanii, jakija majuć mahutnaje ŭradavaje łobi, nie mohuć zamarozić amal hatovyja prajekty, jakija kaštavali im miljardy dalaraŭ.
Ciapier čytajuć
«Abo my ciabie zhvałcim, abo ty paholiš baradu razam z hałavoj». Łachvič raskazaŭ, što ź im adbyłosia13
Kamientary