Nina Stužynskaja budzie stvarać žanočuju palityčnuju partyju
Na schodzie Biełaruskaj žanočaj lihi było pryniata rašeńnie ab stvareńni partyi.
«Chopić absłuhoŭvać «zorak» ad palityki, nie bačym bolej u hetym sensu. Sami budziem stvarać partyju», — zajaviła kiraŭnica arhanizacyi Nina Stužynskaja.
Pa jaje słovach, mnohija z čalcoŭ lihi prymali aktyŭny ŭdzieł u apošniaj parłamienckaj kampanii: chtości byŭ siabram inicyjatyŭnaj hrupy, chtości — naziralnikam.
«Razam pryjšli da vysnovy: chopić kahości absłuhoŭvać. Bo my ž udzielničajem u kožnaj palityčnaj kampanii. My samadastatkovaja arhanizacyja z 20-hadovaj historyjaj. Majem dośvied pieramovaŭ i svaje idei. Pryjšoŭ čas nam zajavić pra siabie jak pra partyju», — kaža spadarynia Stužynskaja.
Jana pryhadvaje, što kaliści žanočaja partyja «Nadzieja» (była likvidavana rašeńniem Miniustu ŭ kastryčniku 2007 h.) mieła davoli surjoznuju padtrymku ŭ hramadstvie.
«Ja pamiataju, prychodziła na lekcyi da studentaŭ, pytała: jakuju partyju jany viedajuć. I ŭsie choram adkazvali: «Nadzieja!» Vielmi heta partyja abnadziejvała ludziej, ale amal 10 hod tamu było pryniata rašeńnie ab jaje likvidacyi. Viedaju, što niekatoryja aktyvistki zastalisia. Płanujem ź imi supracoŭničać», — udakładniła kiraŭnica Biełaruskaj žanočaj lihi.
Jana ličyć, što isnujučyja partyi nie nadta šmat uvahi ŭdzialajuć hiendernym pytańniam.
«Jak ułady, tak i partyi, chutčej, imitujuć hety praces. Za 20 hod i pieršyja, i druhija dobra hetamu navučylisia», — kaža surazmoŭca.
Nina Stužynskaja miarkuje, što biełaruskaje hramadstva hatovaje pryniać žančyn u palitycy. I pryvodzić prykład lidarki «Havary praŭdu» Taćciany Karatkievič, jakaja vyłučałasia na apošnich i prezidenckich, i parłamienckich vybarach.
«Hramadstva vielmi dobra ŭspryniała jaje kandydaturu. U roznych kołach ja čuła, što hałasavali mienavita za Karatkievič. Heta vielmi pazityŭny sihnał», — adznačaje spadarynia Stužynskaja.
Na bližejšych miascovych vybarach jana płanuje vyłučyć svaju kandydaturu.
«Ja baču siabie deputatam u vioscy, dzie žyvu, heta Minski rajon. My jak palityčnaja partyja budziem šmat uvahi ŭdzialać hetaj kampanii. Pa sutnaści, mienavita ź jaje i budziem startavać jak palityčnaja siła», — udakładniaje surazmoŭca.
Pytańni, jakija deputaty pavinny siońnia stavić najpierš — heta zdaroŭje, adukacyja i suvierenitet Biełarusi, miarkuje Nina Stužynskaja.
Lidarka žanočaj lihi adznačaje, što arhanizacyja abjadnoŭvaje kala 100 aktyvistak.
«Źmieny ŭ hramadstvie robić aktyŭnaja mienšaść. U biełaruskich žančynaŭ — vialiki patencyjał. I ja pierakanana, što budučynia mienavita za nami», — padsumoŭvaje Nina Stužynskaja.
* * *
Nina Stužynskaja naradziłasia ŭ 1955 hodzie. Kandydat histaryčnych navuk, dacent. Uznačalvaje RHA «Biełaruskaja žanočaja liha». Pracavała starejšym navukovym supracoŭnikam Instytutu historyi NAN, adnak u 2003-m była zvolnienaja za ŭdzieł ŭ vybarčaj kampanii. Zajmajecca daśledavańniem historyi palityčnych represijaŭ u Biełarusi. Aŭtar knihi «Biełaruś miaciežnaja: z historyi ŭzbrojenaha antysavieckaha supracivu: 20-ja hh. XX st.»
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury6
Kamientary