Abrany prezident Małdovy Ihar Dadonzajaviŭ, što kraina praciahnie implemientacyju Pahadnieńnia ab asacyjacyi ź Jeŭrasajuzam, pakolki ŭ kiraŭnika dziaržavy niama paŭnamoctvaŭ na denansacyju hetaha dakumienta. Pra heta jon zajaviŭ u intervju rumynskim ŚMI, piša Rosbalt.
«Prezident nie maje paŭnamoctvaŭ na denansacyju mižnarodnych damoŭ, u tym liku i Pahadnieńnia ab asacyjacyi ź Jeŭrasajuzam. Tak, u prahramie Partyi sacyjalistaŭ jość taki punkt, ale kiraŭnik dziaržavy nie moža być prezidentam tolki tych, chto hałasuje za sacyjalistaŭ, jon prezident usich hramadzian krainy. Implemientacyja Pahadnieńnia ab asacyjacyi budzie praciahvacca», — padkreśliŭ Dadon.
U toj ža čas jon dadaŭ, što budzie damahacca adnaŭleńnia ekanamičnych adnosin z Rasijaj, nie vyklučajučy praviadzieńnia pieramovaŭ pa hetym pytańni ŭ trochbakovym farmacie z udziełam Małdovy, Jeŭrasajuza i Rasii.
Adnosna intehracyi ŭ Jeŭrazijski Sajuz, abrany prezident adznačyŭ, što «ŭ zaležnaści ad vynikaŭ budučych parłamienckich vybaraŭ (čarhovych u 2018 hodzie, ci pazačarhovych ŭ 2017 hodzie)», Dadon hatovy pravieści refierendum, padčas jakoha sami hramadzianie pavinny adkazać na pytańnie, u jaki sajuz jany chočuć intehravacca — u Jeŭrapiejski ci Jeŭrazijski.
Raniej Dadon nieadnarazova zajaŭlaŭ, što budzie nastojvać na denansacyi Pahadnieńnia ab asacyjacyi ź Jeŭrasajuzam i intehracyi ŭ Jeŭrazijski Sajuz.
Kamientary