«Žyvie Kuba, žyvie Fidel!» — pramova Šejmana na raźvitańni z Kastra
Kiraŭnik spravami prezydenta Biełarusi Viktar Šejman vystupiŭ na raźvitańni ź Fidelem Kastra, što adbyłosia 29 listapada ŭ stalicy Kuby Havanie na płoščy Revalucyi — pierad memaryjalnym kompleksam imia Chase Marci, dzie znachodzicca urna z pracham Kastra.
Pieršyja i apošnija słovy Viktar Šejman pramoviŭ pa-hišpansku. Jon nieadnarazova nazyvaŭ Kastra «niepieramožnym kamandante», siabram Biełarusi, vykazvaŭ nadzieju, što sprava revalucyi budzie žyć.
***
Poŭnaja pramova Šejmana:
«Darahi Raul! Darahija kubinskija siabry! Tavaryšy! Spadary i spadaryni! Z adčuvańniem hłybokaha smutku siońnia my raźvitvajemsia z čałaviekam-epochaj, vydatnym lideram kubinskaj revalucyi, našym siabram kamandante Fidelem.
Ciažka pieradać słovami pačućci, što pierapaŭniajuć našy sercy, kali my pryhadvajem histaryčnyja padziei XX stahodździa, asnoŭnym natchnialnikam i vykanaŭcam jakich byŭ niepieramožny kamandante. Vielizarny asabisty ŭniosak hetaha čałavieka ŭ zabieśpiačeńnie sacyjalnaj spraviadlivaści i hramadzianskaj roŭnaści nia tolki na Kubie, ale i va ŭsim śviecie. Revalucyjnyja vystupy zmaharoŭ za svabodu, što ŭznačaliŭ Fidel, ź ciaham času pieratvarylisia ŭ maštabny vyzvalenčy ruch na rehijanalnym i ŭsiaśvietnym uzroŭni.
Žyćciovy šlach i duchoŭnaja spadčyna pałymianaha kamandante stali aryjentyram dla šmatlikich zmaharoŭ za svabodu svajho narodu. Usio svajo śviadomaje žyćcio jon prytrymlivaŭsia pryncypu: lepiej pamierci stojačy, čym žyć na kaleniach.
Usio jahonaje hieraičnaje, poŭnaje podźvihaŭ i pieramoh žyćcio — vydatny prykład samaaddanaha słužeńnia Ajčynie, prykład adstojvańnia ideałaŭ svabody, roŭnaści i sacyjalnaj spraviadlivaści. U Biełarusi vielmi šanujuć ahramadny asabisty ŭniosak Fidela Kastra ŭ raźvićcio siabroŭskich stasunkaŭ miž našymi dziaržavami.
Jak adznačyŭ prezydent Respubliki Biełaruś Alaksandar Łukašenka, śvietłaje imia biasstrašnaha kamandante załatymi litarami ŭpisanaje ŭ historyju stanaŭleńnia biełaruska-kubinskaha stratehičnaha partnerstva.
Upeŭnieny, što nieśmiarotnaja sprava kamandante Fidela praciahnie svoj histaryčny šlach. Jahonaja spadčyna budzie symbalem spadziavańniaŭ prostych ludziej na spraviadlivaje i ščaślivaje žyćcio. Ciaham dziesiacihodździaŭ Biełaruś zastajecca viernym siabram i nadziejnaj partneram bratniaj Kuby. Tak budzie i dalej.
Darahija siabry. Fidel nie adyšoŭ, Fidel zastajecca. Śvietły vobraz niepieramožnaha kamandante, jahonaja palityčnaja spadčyna z nami nazaŭsiody. Zaŭždy da pieramohi! Žyvie Kuba, žyvie Fidel!»
Były ministr kultury Rusłan Čarniecki znajšoŭ sabie padpracoŭku9
Kamientary