Hruzinskija ŚMI paviedamlajuć, što 28 studzienia ŭ Demakratyčnaj Respublicy Konha (były Zair) byli źbityja dva viertaloty Mi-24. Pa infarmacyi krynic, adzin ekipaž składaŭsia z hramadzian Hruzii, a druhi — Biełarusi.
Infarmacyju paćvierdzili ŭ Ministerstvie abarony Hruzii, adznačyŭšy, što ekipaž nie maje nijakaha dačynieńnia da ŭzbrojenych siłaŭ krainy, a znachodziŭsia ŭ Afrycy ŭ jakaści pryvatnych asob.
Načalnik upraŭleńnia infarmacyi Ministerstva abarony Biełarusi Uładzimir Makaraŭ skazaŭ: «Biełaruskich vajenasłužačych niama na terytoryi inšych dziaržavaŭ». Davać bolš razhornutyja kamientary jon admoviŭsia.
Pres-sakratar Ministerstva zamiežnych spravaŭ Dźmitryj Mirončyk zapeŭniŭ, što viedamstva sočyć za situacyjaj, adnak usio jašče nie moža atrymać aficyjnych źviestak.
«Najbližejšaje pasolstva Biełarusi znachodzicca ŭ Paŭdniova-Afrykanskaj Respublicy. My sprabujem atrymać źviestki ad uładaŭ DR Konha, jak z boku pasolstva ŭ PAR, hetak i pry dapamozie rasijskich kaleh, akredytavanych u DR Konha. Na ciapierašni momant my nie možam havaryć, ci heta byli hramadzianie Biełarusi, ci vychadcy ź Biełarusi, ci ŭvohule niechta inšy», — adznačyŭ Dźmitryj Mirončyk. Jon spadziajecca atrymać bolš detalovuju infarmacyju ciaham zaŭtrašniaha dnia.
Pavodle paviedamleńniaŭ ŚMI, ekipaž, składzieny ź biełarusaŭ, byŭ špitalizavany. Nichto nie zahinuŭ.
DR Konha źjaŭlajecca adnoj z najbolš niestabilnych krain Afryki, faktyčna znachodzicca ŭ stanie hramadzianskaj vajny. Uschodniuju častku krainy, jakaja bahataja karysnymi vykapniami, jak zołata, vołava, tantał, kantralujuć u vialikaj stupieni paŭstancy. U krainie znachodzicca bolš za 20 tysiač miratvorcaŭ AAN.
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary