Ryhoni: Nam skazali, što zatrymańni całkam adpaviadajuć zakanadaŭstvu

Padčas sustreč ź biełaruskimi aficyjnymi asobami ŭzdymałasia pytańnie pra zatrymańni ŭ Biełarusi, skazaŭ u interviju ahienctvu BiełaPAN 24 sakavika specdakładčyk Parlamenckaj asamblei Rady Eŭropy Andrea Ryhoni.

«My, viadoma ž, adznačyli našu pilnuju ŭvahu adnosna hetych zatrymańniaŭ, tym bolš napiaredadni zaŭtrašniaj demanstracyi. Nam skazali, što zatrymańni źjaŭlajucca čysta administracyjnymi i całkam adpaviadajuć dziejnamu zakanadaŭstvu. My vykazali svaju nadzieju, što demanstracyja projdzie samym mirnym čynam, bieź jakich-niebudź incydentaŭ», — zajaviŭ Ryhoni.

Na pytańnie, ci buduć u dakładzie ab sytuacyi ŭ Biełarusi, jaki jon rychtuje, adlustravanyja masavyja zatrymańni biełaruskich hramadzian, u tym liku paśla dazvolenaj uładami akcyi 15 sakavika, specdakładčyk adkazaŭ: «My nia majem takoj infarmacyi. My spadziajemsia, što ich nia tak šmat. My ŭpeŭnienyja, što heta možna pieraadoleć, što možna budzie svabodna pravieści demanstracyju [25 sakavika] ŭ miežach tych praviłaŭ, jakija praduhledžanyja nacyjanalnym zakanadaŭstvam».

Ryhoni ličyć spraviadlivaj mahčymaść «vykazać svajo mierkavańnie za ci suprać adnosna niejkich zakanadaŭčych pastanoŭ i palityčnych mierkavańniaŭ».

Pavodle jaho, kali b Biełaruś była čalcom Rady Eŭropy, to arhanizacyja mahła b «paŭpłyvać značna bolš dziejsna na padziei, źviazanyja z zachavańniem tych kaštoŭnaściaŭ i standartaŭ, jakija prasoŭvaje, to bok pavaha da pravoŭ čałavieka».

«Adnak, kab uvajści ŭ skład Rady Eŭropy, nieabchodna vykonvać peŭnyja ŭmovy, — dadaŭ Ryhoni. — Voś čamu my nastojvajem na ŭviadzieńni maratoryja na śmiarotnaje pakarańnie, tamu što heta — pieršaje prava. Dalej možna padumać pra inšyja pravy, jakija majuć patrebu ŭ abaronie. Ale pieršaje prava, jakoje my pavinny abaraniać, — heta prava na žyćcio, tamu što biez žyćcia niama svabody vykazać svajo mierkavańnie».

Ryhoni abvierh infarmacyju pra toje, što jon nibyta pieranios adlot ź Minska z 24-ha na 25 sakavika, kab mieć mahčymaść nazirać za demanstracyjaj. «Ja, ščyra kažučy, navat nia viedaŭ pra toje, što budzie demanstracyja, pra heta ja daviedaŭsia, kali byŭ tut. Ja adlataju 25 sakavika vyklučna z-za taho, što laču ŭ Sankt-Pieciarburh, dzie budzie prachodzić kanferencyja parlamentaŭ SND, ABSE i pradstaŭnikoŭ Rady Eŭropy. Planavałasia, što ja palaču ź Miensku 24 sakavika, ale potym dadałasia hetaja kanferencyja i, kab nie lacieć spačatku ŭ Italiju, a potym adrazu ž nazad lacieć u Sankt-Pieciarburh, ja palaču tudy ź Miensku», — skazaŭ u hutarcy z karespandentam BiełaPAN specdakładčyk PARE.

• 0
• 0
• 0
• 0
• 0
• 0
• 0
• 0