Sumnaja viestka pryjšła ź Bieraściejščyny. Na 67 hodzie žyćcia raptoŭna pamior viadomy biełaruski navukoviec i hramadski dziejač Hienadź Pranievič.
Hienadź Pranievič naradziŭsia 3 kastryčnika 1950 hoda ŭ v. Žarabkovičy Lachavickaha rajona Bieraściejskaj vobłasci ŭ sialanskaj siam‘i. Skončyŭ Žarabkovickuju siaredniuju škołu. Pracavaŭ tokaram na Bieraściejskim zavodzie «Hazaaparat», paśla rabočym pošukavaha adździeła «Abłmižkałhasprajekta» u aboasnym centry.
U vierasni 1969 hodu staŭ studentam biełaruska-rasiejskaha adździaleńnia fiłałahičnaha fakulteta Biełdziaržuniviersiteta, jaki skončyŭ u 1974 hodzie. Dva hady słužyŭ aficeram u Savieckaj Armii. Paśla vykładaŭ biełaruskuju i rasiejskuju litaratury i zajmaŭ pasadu namiesnika dyrektara pa vučebna-vychavaŭčaj rabocie ŭ Bieraściejskim SHPTV-65 budaŭnikoŭ. Paśla zakančeńnia aspirantury pry kafiedry biełaruskaj litaratury Biełdziaržuniviersiteta ź śniežnia 1983 h. pačaŭ pracavać u Bieraściejskim piedahahičnym instytucie asistentam na kafiedry biełaruskaj litaratury. U 1990 h. abaraniŭ kandydackuju dysiertacyju.
U červieni 1991 h. vybrany na pasadu dacenta kafiedry biełaruskaha litaraturaznaŭstva. U sakaviku 1994 h. pa prapanovie Uładzimira Kaleśnika byŭ abrany zahadčykam kafiedry biełaruskaha litaraturaznaŭstva. Z 1997 pa travień 2000 h. byŭ u daktarantury pra Instytucie litaratury imia Janki Kupały NAN Biełarusi. Dvojčy (1999, 2002 hh.) stažyravaŭsia pry Instytucie Polskaj fiłałohii Jahiełonskaha univiersiteta ŭ Krakavie. Ciaham 10 hadoŭ — z 1994 pa 2004 h. — abiraŭsia staršyniom Bieraściejskaha adździaleńnia HA «Fond imia Lva Sapiehi».
Z 2000-ha pracavaŭ dacentam kafiedry biełaruskaha litaraturaznaŭstva Bieraściejskaha dziaržuniviersiteta. Hienadź Pranievič — aŭtar šmatlikich litaraturaznaŭčych rabot. Viedamy jak litaraturny krytyk, paet i publicyst. Hruntoŭna daśledavaŭ uzajemasuviazi siaredniaviečnaj i novaj biełaruskaj litaratury, pracesy historyka-kulturnaha ŭzajemadziejańnia i raźvićcia ramantyzmu ŭ słavianskich litaraturach. Daśledavaŭ bijahrafiju Lva Sapiehi, vydaŭ na hetuju temu šerah knižak. U Hienadzia Pranieviča zastalisia žonka i troje darosłych dziaciej. Śvietłaja pamiać…
Kamientary