U Minsku adbyłosia pasiadžeńnie arhkamiteta pa stvareńni partyi «Žanočaja alternatyva». Inicyjatarki prajektu — Nina Stužynskaja i Valancina Bołbat.
«U 1990-ja na chvali demakratyi paŭstavali žanočyja arhanizacyi, partyja «Nadzieja». A siońnia ŭ Biełarusi ich nie zastałosia, niama žanočych frakcyjaŭ, — adznačyła «Biełaruskamu partyzanu» Nina Stužynskaja. — Da žančyn u partyjnym ruchu staviacca jak da «absłuhi». Jany patrebnyja dla vykanańnia peŭnaj pracy. Zvyčajna napiaredadni prezydenckich, parlamenckich ci miascovych vybaraŭ pry partyjach raptam pačynajuć stvaracca žanočyja NDA. I zrazumieła, čamu. Partyja maje patrebu ŭ novych kanałach finansavańnia, «pracoŭnaj siły» na vybarach. Tamu i źjaŭlajucca žanočyja prajekty».
Spadarynia Stužynskaja kaža, što praktyka funkcyjanavańnia žanočych supołak śviedčyć: žančyny abjadnoŭvajucca ŭ sajuzy, kali im treba vyrašyć i prasunuć ułasnyja zadačy, a nia prosta prapahandavać prahramu partyi:
«Nivodnaja z partyjaŭ za čas svajho isnavańnia nie vypracavała pazycyi ŭ pytańni ab pravach žančyn. Akramia taho, navat asobnyja sproby prasunuć hienderny paradak natykajucca na nadumanyja pracedury, kali dla vyrašeńnia pytańnia ab praviadzieńni analizu dziejnaści žanočaj hrupy patrabujecca zhoda prezydyjumu partyi ci CK. Takoje ŭražańnie, što pytańnie nosić sakretny charaktar. Vidavočna, što hiendernaja razbalansavanaść jak u palityčnych partyjach, tak i va ŭładzie nehatyŭna ŭździejničaje na efektyŭnaść palityčnaj systemy».
Adna z zadač novaha abjadnańnia — hiendernaja roŭnaść, źmiena stereatypaŭ ab roli žančyn i mužčyn u sučasnym hramadztvie, zabieśpiačeńnie adnolkavych pravoŭ dla samarealizacyi jak u publičnaj sfery, tak i ŭ pryvatnaj, vyraŭnoŭvańnie isnujučych dysbalansaŭ:
«Naprykład, pavieličeńnie ŭdziełu žančyn u palitycy i bolšaje pryciahnieńnie mužčyn u praces vychavańnia dziaciej u siamji. Da takich źmienaŭ niemahčyma pryjści biez farmavańnia šyrokaj hramadzkaj pazycyi, padtrymki dziaržavy. Važna mianiać zakony, prapisvać efektyŭnyja mechanizmy i sankcyi dla dasiahnieńnia raŭnapraŭja žančyn i mužčyn. Na žal, siońnia biełaruskija palityki niaredka dazvalajuć sabie dyskryminacyjnyja vykazvańni ŭ dačynieńni da žančyn. Instytucyjanalny mechanizm prasoŭvańnia hiendernaj roŭnaści pracuje słaba: nacyjanalny plan maje tolki farmalnaje značeńnie».
Pavodle Niny Stužynskaj, ideja «Žanočaj alternatyvy» ŭźnikła pieradusim tamu, što žančyny majuć patrebu ŭ padtrymcy dla intehracyi ŭ palityku ŭ siłu svajoj sacyjalnaj vyklučanaści:
«Žančyny niama tam, dzie farmujecca i dzielicca biudžet, vyznačajucca ŭnutrypalityčnyja i vonkavyja pryjarytety; dahetul mała žančyn u vialikim biznesie», — padsumoŭvaje inicyjatarka stvareńnia žanočaj partyi.
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury4
Kamientary