«Iźviestija»: Biełaruś u sakaviku zakupiła dvuchhadovy abjom tureckich pamidoraŭ dla kantrabandy

U sakaviku hetaha hoda Biełaruś zakupiła ŭ Turcyi rekordnuju kolkaść tureckich pamidoraŭ — na $17,7 młn, vynikaje ź infarmacyi Instytuta statystyki Turcyi (Turkstat). Za ŭvieś 2015 hod Biełaruś impartavała pamidoraŭ na $7,9 młn. Takim čynam, abjom pastavak u sakaviku ŭ dva razy pieravyšaje abjom, jaki Biełaruś zaviezła za ŭvieś 2015 hod — u toj čas, kali zabarona na ŭvoz u Rasiju tureckich pamidoraŭ nie dziejničała i, takim čynam, nie było i biełaruskaha reekspartu.

Rost zakupak Biełaruśsiu tureckich tamataŭ adbyvajecca na fonie pretenzij Raśsielhasnahladu, jaki nie raz vyjaŭlaŭ hruzy z «sajuznaj dziaržavy» z zabaronienymi da ŭvozu praduktami, adznačajuć «Iźviestija».

Pavodle źviestak Turkstata, u 2016 hodzie maksimum, jaki ŭvoziła Biełaruś, byŭ zafiksavany taksama ŭ sakaviku, ale jon byŭ na $8,5 młn. Kali supastavić kvartał da kvartała, to ŭ pieršyja try miesiacy 2016 hoda Biełaruś zakupiła ŭ Turcyi tamataŭ na sumu $18,8 młn, sioleta — na $27,2 młn.

U pres-słužbie Raśsielhasnahladu paviedamili, što ŭ sakaviku—krasaviku 2017 hoda terytaryjalnymi ŭpraŭleńniami słužby «było spyniena bolš za 30 sprob uvozu tamataŭ tureckaha pachodžańnia, što śviedčyć pra najaŭnaść niezakonnych kanałaŭ pastavak z Respubliki Biełaruś na terytoryju Rasijskaj Fiederacyi sankcyjnaj pradukcyi».

— Ciapier — siezon pamidoraŭ u Turcyi, u hety pieryjad pastaŭlajecca samaja vialikaja kolkaść tamataŭ, pryčym hruntovych. Košty na ich nizkija, akramia taho, sioleta ŭ Turcyi istotny rost uradžaju. Vidavočna, tureckija vytvorcy raźličvali, što rasijski rynak adkryjecca na fonie naładžvańnia adnosin pamiž krainami. Kali hetaha nie adbyłosia, praficyt tamataŭ paŭpłyvaŭ na źnižeńnie koštu. Biełaruś skupiła pamidory, imavierna, pa nizkaj canie, adpaviedna hetyja zakupki adabjucca na roście niezakonnych pastavak pamidoraŭ u Rasiju. Z ulikam nizkaj cany na tureckija pamidory pryvabnaść dla biełaruskich kantrabandystaŭ vidavočnaja. Pryčym ryzyki minimalnyja, bo taki biznes pakryvajecca na dziaržaŭnym uzroŭni ŭ Biełarusi, — adznačyŭ u intervju «Iźviestijam» prezident rasijskaha Nacyjanalnaha sajuza vytvorcaŭ pładoŭ i harodniny Siarhiej Karaloŭ.

Da ŭviadzieńnia embarha Rasija była najbujniejšym imparcioram tureckich pamidoraŭ, suma hadavoha impartu składała kala $250 młn. Takim čynam, sakavickija zakupki tureckich pamidoraŭ Biełaruśsiu supastaŭnyja ź siaredniemiesiačnym zakupkami Rasii da zabarony na impart.

U cełym pa vynikach minułaha hoda Biełaruś stała najbujniejšym imparcioram tureckich pamidoraŭ. Abjom zakupak skłaŭ $42,4 młn, pišuć «Iźviestija».

• 0
• 0
• 0
• 0
• 0
• 0
• 0
• 0