«Pracoŭnaj movaj u jaho była biełaruskaja»: pamior były mer Minska Alaksandr Hierasimienka
Na 72-m hodzie žyćcia pamior dziaržaŭny słužačy, dypłamat Alaksandr Hierasimienka. Jon naradziŭsia ŭ 1946-m va Uździe Minskaj vobłaści. Skončyŭ mašynabudaŭničy fakultet Biełaruskaha politechničnaha instytuta (1969); zavočnaje adździaleńnie Minskaj vyšejšaj partyjnaj škoły KPB, vykładčyk hramadskich dyscyplin (1986).
Ad 1991 da 1994 Alaksandr Hierasimienka ŭznačalvaŭ Minharvykankam, a taksama Minski haradski saviet deputataŭ. Adnačasova jon byŭ deputatam Viarchoŭnaha savieta 12-ha sklikańnia.
U 1995 Alaksandr Łukašenka pryznačaje Hierasimienku pasłom u Bałharyju. Papracavaŭ namieśnikam ministra zamiežnych spravaŭ. Ad 2006 da 2013 byŭ pasłom Biełarusi ŭ Łatvii.
Pra Alaksandra Hierasimienku zhadvaje pravaabaronca-viasnoviec Aleś Bialacki, jaki papracavaŭ razam ź im u harsaviecie.
«Jon byŭ z kamunistyčnaj namienkłatury nižejšaha ŭzroŭniu. Kali my byli razam u harsaviecie, jon ačolvaŭ adzin z rajkamaŭ Minska, byŭ dastatkova maładym. Na maju dumku, jon adnosiŭsia da adnosna prasunutaj hrupy technakrataŭ, jakija adnačasova rabili karjeru ŭ kampartyi, adnak paśla taho, jak razvaliŭsia Saviecki Cajuz, źnikła kampartyja, jon zmoh dastatkova mocna vyraści.
Pa-pieršaje, Hierasimienka pierajšoŭ na biełaruskuju movu. Heta była jaho pracoŭnaja mova padčas pracy ŭ Minskim harsaviecie. Pa-druhoje, jon staraŭsia zajmać niejtralnuju pazicyju, jon staraŭsia adyści ad kamunistyčnaj mafii, jakaja trymała peŭnyja pazicyi. Ź im možna było vyrašać pytańni, u tym liku datyčnyja biełaruskaj kultury.
Jon mnie niečym nahadvaje Michaiła Maryniča — heta prykładna adna hrupa technakrataŭ, dla jakich niezaležnaść Biełarusi nie była pustym hukam.
Hierasimienka ŭ tyja hady adnaznačna nie byŭ prychilnikam Łukašenki. I toje, što jaho adpravili pasłom, — heta, chutčej, hanarovaja vysyłka adnoj z realnych palityčnych fihur. Mahčyma, u jaho nie chapiła takoha bajavoha zapału. Była takaja pradbačlivaść i aściarožnaść, tamu jon nie zaniaŭ bolš pryncypovuju pazicyju, jak zrabiŭ toj ža Marynič. Ale pa pohladach jany byli padobnymi — heta dakładna.
U mianie da Alaksandra Hierasimienki supiarečlivaje staŭleńnie. Z adnaho boku, zrazumieła, jon byŭ pradstaŭnikoŭ staroj kamunistyčnaj sistemy, ź jakoj my zmahalisia. Ź inšaha — jon zdoleŭ transfarmavacca, jon zdoleŭ pryniać i adčuć nacyjanalnyja intaresy. Jon byŭ dastatkova demakratyčnym dziadźkam, jon zdoleŭ adčuć plusy demakratyčnaha hramadstva. Tut jon razychodziŭsia, kaniečnie, z Łukašenkam, bo ŭ jaho inšyja padychody da ŭłady byli».
Kamientary