Niaklajeva asudzili na 10 sutak za «zaklik da akcyi», u jakoj jon nie ŭdzielničaŭ

Paeta i palityka Uładzimira Niaklajeva asudzili na 10 sutak aryštu za słovy «kali jość vola baranić svaje pravy, dyk treba vychodzić i baranić», skazanyja im 16 kastryčnika ŭ efiry telekanała «Biełsat» pra akcyju «Marš aburanych biełarusaŭ 2.0», paviedamlaje Radyjo Svaboda.

U akcyi Niaklajeŭ nie ŭdzielničaŭ. Milicyjanty tady skłali na jaho pratakoł za «zaklik da praviadzieńnia masavaha mierapryjemstva z parušeńniem jaho arhanizacyi i praviadzieńnia».

U sudzie Niaklajeŭ adrazu zrabiŭ chadajnictva, kab dałučyli da materyjałaŭ spravy moŭnuju ekspertyzu jahonaha vykazvańnia ŭ repartažy «Biełsat». Ekśpiertyzu zrabiŭ Sajuz biełaruskich piśmieńnikaŭ. Taksama palityk prasiŭ sud dałučyć da spravy zvarot BAŽa ŭ jahonuju abaronu. Hetyja chadajnictvy sud zadavoliŭ.

U sudzie byŭ začytany pratakoł administracyjnaha parušeńnia, jakoje nibyta ździejśniŭ Uładzimir Niaklajeŭ: pavodle pratakoła, Niaklajeŭ nibyta publična zaklikaŭ da masavaha mierapryjemstva, zajaŭlenaha na 21 kastryčnika, jakoje Minharvykankam nie dazvoliŭ.

Kamientujučy u sudzie składzieny na jaho pratakoł, Niaklajeŭ nazvaŭ spravu «sfabrykavanaj i źniavažlivaj dla suda».

«Jany skinuli vam hetuju spravu, jak siena, maŭlaŭ, źjaduć. Dzie tut maje słovy pra toje, što ja nibyta zaklikaŭ? Ja nie admaŭlaŭsia ad słovaŭ «kali ŭ vas jość vola baranić svaje pravy, dyk treba vychodzić i baranić». Heta ŭmoŭny skaz, jaho vyvučajuć ŭ šostym klasie. Toj milicyjant, jaki skłaŭ hety dakumient, niepiśmienny. Adrazu kažu, što spasyłka na Chartyju97 da mianie nie maje adnosin, i zahałovak inšy, čym na Biełsacie. Heta prosta žadańnie pakarać čałavieka pa niejkich vydumanych słovach i dziejańniach, jakija jon nie rabiŭ i nie kazaŭ», — zajaviŭ jon.

Taksama jon dadaŭ, što nie kazaŭ žurnalistu «Biełsata», što budzie ŭ udzielničać ŭ «Maršy aburanych biełarusaŭ 2.0», bo nie byŭ upeŭnieny, ci budzie ŭ Minsku.

«Jak ja moh zaklikać da ŭdziełu ŭ mierapryjemstvie, u jakim sam nia budu brać udziełu i nie źjaŭlajusia arhanizataram? Heta kazaŭ Statkievič, ale dzie ja, a dzie jon. Adzin siadzić, dyk vyrašyli i druhoha pasadzić?» — skazaŭ Niaklajeŭ.

Sud prahladzieŭ i videazapis intervju, jakoje «Biełsat» ŭziaŭ u Niaklajeva 16 kastryčnika ŭ prahramie «Haračy kamientar». Mienavita hetaje intervju, pavodle materyjałaŭ spravy, sajt Chartyi97 vykarystaŭ dla svajho artykuła.

Kamientujučy vyrak, palityk papiaredziŭ, što kali ź im niešta tam zdarycca, dyk heta budzie naŭmysnaje zabojstva, i skazaŭ advakatu abskardžać pastanovu suda. Palityk pryjšoŭ na sud u kaściumie, patłumačyŭšy, što źbiraŭsia ŭ lakarniu na abśledavańnie, tamu da turmy nie hatovy.

• 0
• 0
• 0
• 0
• 0
• 0
• 0
• 0