Prezentacyja ilustravanaha idyš‑biełaruskaha słoŭnika, što składzieny specyjalistam u halinie movy idyš i restaŭrataram Alaksandram Astravucham, prajšła 26 vieraśnia ŭ mienskim ofisie «Tavarystva biełaruskaj movy imia Franciška Skaryny».
Prezentacyja ilustravanaha idyš‑biełaruskaha słoŭnika, što składzieny specyjalistam u halinie movy idyš i restaŭrataram Alaksandram Astravucham, prajšła 26 vieraśnia ŭ mienskim ofisie «Tavarystva biełaruskaj movy imia Franciška Skaryny».
U 928‑staronkavaje vydańnie, što vyjšła ŭ mienskim vydaviectvie «Medysan» nakładam 1 tys. asobnikaŭ, uklučana kala 25 tys. słoŭnikavych artykułaŭ i 50 tys. słoŭ. U knihu, nad jakoj składalnik pracavaŭ 11 hadoŭ, uvajšła frazealohija idyš z prymaŭkami i prykazkami, pažadańniami i pryvitańniami, dražniłkami i praklonami, zahadkami i skarahavorkami, kalamburami, cytatami ź jaŭrejskich piesień, anekdotaŭ i litaraturnych tvoraŭ. Pry składańni knihi A.Astravuch vykarystoŭvaŭ šmat słoŭnikaŭ, što vychodzili ŭ roznych krainach śvietu ŭ XIX—XX stahodździach.
Adkryvajučy prezentacyju, namieśnik staršyni TBM Alena Dzicevič adznačyła symbaličnaść akcyi, što prachodzić u Dzień eŭrapiejskich moŭ i śviedčyć ab tym, što biełaruskaja mova «ŭlivajecca ŭ suśvietnyja movy». Pavodle jaje słoŭ, za 20 hadoŭ isnavańnia abjadnańnie vydała kala 10 słoŭnikaŭ. Namieśnik staršyni TBM vykazała ŭpeŭnienaść, što maładoje pakaleńnie pradoŭžyć hetu tradycyju, bo ŭ narodaŭ Biełarusi «vielmi mahutnaja hrybnica».
Składalnik słoŭnika miarkuje, što biez movy idyš nie budzie isnavać biełaruskaja mova. Jon nahadaŭ, što Biełaruś źjaŭlajecca adzinaj krainaj śvietu, dzie z 1920 pa 1938 hady idyš byŭ dziaržaŭnaj movaj.
Kandydat filalahičnych navuk Piotr Sadoŭski nazvaŭ słoŭnik «žyvym śviatam dušy», a doktar filalahičnych navuk Adam Maldzis — «sapraŭdnaj encyklapedyjaj jaŭrejskaha žyćcia».
Pavodle słoŭ kandydata histaryčnych navuk, dyrektara Muzeja historyi i kultury jaŭrejaŭ Biełarusi Iny Hierasimavaj, vydańnie hetaha unikalnaha słoŭnika, jaki nie maje analahaŭ u historyi, źjaŭlajecca podźviham jaho składalnika, što dapamahaje adradzić idyš. «Jon zastaŭsia ŭ knihach, ale pierastaŭ być movaj znosin, bo ŭ vyniku Chałakostu źnikli nośbity idyš. Vychad słoŭnika dakazvaje, što navat u takich umovach mova moža žyć i raźvivacca», — skazała I.Hierasimava.
A.Astravuch vyvučaje idyš z 1984 hoda. U 2004 hodzie skončyŭ Vilenski jaŭrejski instytut Vilenskaha ŭniversytetu (Litva). Ciapier A.Astravuch pracuje nad stvareńniem idyš‑rasiejskaha słoŭnika.
Kamientary