Praviły žyćcia plus-sajz madeli z Mahilova: «Mahu i ŭdaryć!»
Hanna Siakackaja — adna z najbolš zapatrabavanych madelaŭ plus-sajz u Biełarusi. Jana aktyŭna zdymajecca dla ajčynnych katałohaŭ adzieńnia, paśpieła papracavać u Turcyi i Indyi, a niadaŭna prajšła žorstkija kastynhi i trapiła na ŭkrainskaje šou «Madel XL». Hanna abyšła tysiaču inšych pretendentak i stała adnoj ź dziesiaci ŭdzielnic prajekta, pieršy siezon jakoha skončyŭsia ŭ śniežni.
My źviazalisia z hetaj pazityŭnaj i ŭpeŭnienaj u sabie dziaŭčynaj, fotazdymki jakoj vy mahli sustrakać u svaim horadzie, kab raspytać pra madelny biznes u Biełarusi, pracu nad saboj i płany na žyćcio.
Ja zaŭsiody była mažnaj dziaŭčynkaj. Ale z-za hetaha ŭ mianie amal nikoli nie było prablem. Adnakłaśniki i adnahrupniki ź mianie nie ździekavalisia — moža, mnie pašancavała ź ludźmi navokał, a moža, prosta zarekamiendavała siabie čałaviekam, jaki nie daruje takich rečaŭ. Kali ty dazvalaješ abychodzicca z saboj niepryhoža, ludzi buduć praciahvać heta rabić.
Ja žyvu pa pryncypie «majo cieła — maja sprava». Chočaš — pracuj nad kubikami, chočaš — nie. Ale nikomu nie naviazvaj svoj styl žyćcia jak adziny pravilny.
Ź niepryjemnych uspaminaŭ dziacinstva — toje, što mianie nie ŭziali na tancy praz maju vahu. Choć ja mahła sieści na špahat i «chadziła» kołam. Hetaha nie ŭmieli chudyja dziaŭčaty. U himnazii z maimi pamierami było składana nabyć pryhožuju školnuju formu. Dobra, što siońnia takoha niama: rynak adzieńnia bahaty na roznyja madeli i fasony, jaki b pamier ty nie nasiŭ. Aby hrošy byli.
Fatahrafavacca ja lubiła zaŭsiody. Pamiataju, kali stvaraŭsia školny albom, my ź siabroŭkami kreatyvili bolš za inšych: amal adnolkava apranulisia dziela zdymak, prydumali ŭklučyć u kadr mylnyja burbałki i pienu ad šampanskaha.
Pieršyja surjoznyja zdymki z prafiesijnym makijažam adbylisia ŭ mianie padčas studenctva ŭ Biełaruskaj dziaržaŭnaj sielskahaspadarčaj akademii, dzie vučyłasia na mieniedžara-ekanamista. Ja ŭvohule pahadžałasia na ŭsie prapanovy ad fatohrafaŭ-pačatkoŭcaŭ, navat kali razumieła, što jany zdymajuć drenna. Mnie treba było vučycca pracavać pierad kamieraj.
Kamiercyjnuju prapanovu atrymała dzieści praz hod paśla pieršych zdymak. Dla pracy nad składańniem katałoha z adzieńniem patrabavalisia dziaŭčaty 42 i 52 pamieraŭ. U mianie — 48, ale vyrašyła adkliknucca na abjavu ŭ internecie. I ja spadabałasia klijentam. Raspłacilisia tady sa mnoj adzieńniem — vaŭkašapkaj.
Madellu plus-sajz mianie ŭpieršyniu nazvali padčas zdymak u Indyi. Siarod inšych dziaŭčat ja była adzinaj z formami i, jak nazło, mianie zaprašali na mienšuju kolkaść kastynhaŭ. Tady ŭ mianie ŭpieršyniu pačalisia zahony i dumki: moža, treba skinuć vahu? Ale potym ja supakoiłasia.
Sama siabie ja nie adčuvaju plus-sajz. Heta aznačeńnie padkreślivaje, što «ty nie takaja, jak inšyja». Ja — zvyčajnaja madel. Prosta chtości adnojčy prydumaŭ, što niz, šyrejšy za 92 santymietry, užo nie standart. Tak možna bolšaść žančyn na płaniecie adnieści ŭ katehoryju plus-sajz. Mnie padabajecca, kali nas nazyvajuć žančynami z formami: kali jość talija, jahadzicy i hrudzi.
Razam sa mnoj u Horkach vučyłasia dosyć «abjomnaja» dziaŭčyna, jašče i rostam 180. Ale jana była nastolki modnaja, śpiavała i tak dobra ŭmieła siabie padać — prosta śviaciłasia znutry, što chłopcy za joj biehali kałonami. Kali ty šeraja myška, zamknionaja ŭ sabie, to i z 40 kiłahramami možaš być adzinokaj i niecikavaj. Vahu možna skinuć, ale toje, što ŭnutry — nie.
Nie treba dumać, što madeli plus-sajz jaduć usio, što zachočuć, i zusim nie siabrujuć sa sportam. Kaniečnie, ja nie admaŭlaju sabie ni ŭ papkornie, ni ŭ sušy, kali duša patrabuje. Ale navat plus-sajz dziaŭčaty pavinny trymać siabie ŭ formie. Jak kaža maja siabroŭka: u kožnaha jość svoj limit tłustaści, ź jakim ty budzieš vyhladać naležna. Ja kamfortna adčuvaju siabie ŭ 48-m pamiery. Kali nabiraju vahu paśla śviataŭ, pakutuju. Ja maju abaniemient u trenažornuju zału i letam namotvaju šmat kiłamietraŭ pa horadzie na rovary. Ja nie zacyklena na sporcie, ale jon maje miesca ŭ maim žyćci.
Biełaruskija vytvorcy adzieńnia ŭsio čaściej asensoŭvajuć, što vopratku treba rekłamavać nie tolki na chudych madelach. Kali biełaruska z 50-m pamieram zachodzić na niejki sajt, kab vybrać sabie novuju sukienku, jana choča bačyć, jak heta siadzić na dziaŭčynie jaje pamieraŭ, bo na chudzieńkaj i miašok budzie pryvabnym.
Ja šmat zdymajusia dla katałohaŭ z bresckim trykatažam. I maje zamoŭcy majuć vialikuju patrebu ŭ novych tvarach, zaŭsiody prosiać paraić kaho-niebudź dla zdymak. Zapyt na plus-sajz madelaŭ jość, ale znajści takich, jakija b umieli pracavać pierad kamieraj, ciažka. Ja ŭpeŭnienaja, što jany isnujuć, ale niedzie siadziać i chavajucca, bo ŭsio jašče saromiejucca siabie.
Ja nikoli nie sutykałasia ź niejkim hvałtam ci niepryjemnym flirtam na pracy, ale kalažanki raskazvali, što takoje było. Asabliva šmat niepryjemnych vodhukaŭ pra kantraktnuju pracu ŭ Turcyi. Mianie takija rečy abminali, bo, dumaju, adčuvajecca, što ja mahu i ŭdaryć zamoŭcu, nie budu hladzieć na jaho status.
U mianie chapaje drennych zvyčak, ja ŭ hetym płanie zvyčajny čałaviek. Mahu vyciskać sabie i małodšamu bratu pryščy, kavamanka, lublu šampanskaje. A jašče — internet- i telefonazaležnaja.
Na ŭkrainskaje šou «Madel XL» ja trapiła dziakujučy žurnalistam z kanała 1+1, jakija znajšli moj profil u instahramie. Jany zaprasili mianie na pieršy kastynh, mnie pryjšłosia admianić usie svaje zdymki tut i pajechać u Kijeŭ. Ja nie dumała, što prajdu navat pieršy adbor, ale ŭ vyniku trapiła ŭ dziasiatku najlepšych kankursantak. Asobny dziakuj tut treba skazać maim baćkam. Jany taksama adkłali ŭsie spravy i pavieźli mianie ŭ Kijeŭ na mašynie, bo kvitkoŭ na toj momant było ŭžo nie dastać. Maci i tata zaŭsiody padtrymlivali mianie va ŭsim. Pamiataju, u škole ja skazała, što mnie vielmi padabajecca šyć na ŭrokach pracy — jany z babulaj chutka padaryli mnie šviejnuju mašynku. Padabajecca — raźvivajsia ŭ hetaj spravie.
Ź dziaŭčatami na šou ŭ nas byli dobryja adnosiny, my praciahvajem kamunikavać i ciapier. Praŭda, zdaralisia vypadki, kali niechta moh nie prakamientavać ciabie ŭ tvar, ale rabiŭ heta na kamieru. Potym ty bačyŭ praŭdzivaje staŭleńnie da ciabie ŭ efiry.
Na žal, pakul što ŭ Biełarusi niemahčyma pražyć tolki na hrošy, što zarablaje madel plus-sajz. Moža, heta stanie realnaściu praź jaki dziasiatak hadoŭ, kali bolš vytvorcaŭ i kampanij zrazumiejuć, što adzieńnie treba nie tolki chudym.
Ja płanuju raźvivacca ŭ hetaj halinie, ale chaciełasia b vyjści za miežy paziravańnia. Kaniečnie, u katehoryi plus-sajz uzrostavyja miežy bolš raspłyŭčatyja, čym u «zvyčajnych» madelaŭ. Ale ničoha nie viečna. Tamu ŭ budučyni ja b chacieła zapuścić ułasnuju liniejku bializny dla dziaŭčat ź niestandartnymi formami. A jašče — adkryć pieršaje ahienctva dla takich madelaŭ, jak ja.
Kamientary