Što rabić, kali na noŭtbuk praliłasia vadkaść?

Častaja pryčyny pałomki noŭtbukaŭ — pralityja na kłavijaturu vada, kava, piva. U mnohich vypadkach zality noŭt možna adramantavać, ale pośpiech zaležyć ad nastupnych dziejańniaŭ jaho ŭładalnika. «Naša Niva» skłała płan dziejańniaŭ, prytrymlivajučysia jakoha vy pavialičycie šancy na toje, što vaša pryłada vam jašče pasłužyć.

1. Najpierš vyklučajem

Heta — nie toj vypadak, dzie treba kłapacicca pra karektnaje zaviaršeńnie pracy apieracyjnaje sistemy. Tamu pieršaje, što nieabchodna zrabić, kali vadkaść užo akazałasia na kłavijatury, — imhnienna vymknuć noŭtbuk ad sietki, a taksama dastać z korpusa batareju. Kali ž apošniaja ŭbudavanaja ŭ korpus, treba nacisnuć na knopku vyklučeńnia pryłady.

Zrabić hetyja dziejańni treba jak maha chutčej, pakul vadkaść nie dasiahnuła «žyćciova važnych» elemientaŭ i nie pryviała da karotkaha zamykańnia.

2. Paśla vydalajem vadkaść

Jak tolki vaš noŭtbuk adklučany. Dla hetaha (taksama jak maha chutčej) pieraviarnicie jaho kłavijaturaj uniz i čakajcie, pakul nie ściače ŭsia vada abo piva. Reštki vilhaci aściarožna pramaknicie z dapamohaj papiarovaje survetki. Ni ŭ jakim razie nielha naciskać na knopki, kab nie dać vadkaści praniknuć uhłyb korpusa! 

3. Sušym

Kali z pryłady ŭžo ničoha nie ciače i zvonku jana padajecca suchoj, možna pakinuć jaje na paru dzion u ciopłym, ale nie haračym, miescy. Dla sušeńnia nielha karystacca fienam i inšymi nahravalnymi pryładami, bo jany mohuć raspłavić niekatoryja elemienty kampjutara. Praz dva-try (a lepiej — čatyry) dni, kali vy ŭpeŭnienyja, što ŭnutry nie zastałosia vilhaci, možna pierachodzić da nastupnaha punkta.

4. Uklučać ci addavać u servisny centr?

Pralityja na noŭtbuk vadkaści možna padzialić na dva vidy: nieahresiŭnyja i ahresiŭnyja. Da pieršych adnosiacca vada, harbata biez cukru. Usie astatnija (kava, piva, sok, haziroŭka) zvyčajna ŭtrymlivajuć sol i cukar i ličacca ahresiŭnymi, bo paskarajuć praces karozii elemientaŭ, na jakija jany trapili.

Kali pralitaja na kłavijaturu vadkaść była nieahresiŭnaj, paśla sušeńnia možacie pasprabavać uklučyć noŭtbuk. Kali pracuje — vaša ščaście. Ale lepš usio ž nie škadavać hrošaj i praz tydzień-druhi pakazać noŭtbuk śpiecyjalistam ci chacia b zazirnuć usiaredzinu pryłady (papiarednie abiastočyŭšy), kab zapeŭnić siabie, što nidzie niama iržavych padciokaŭ i nienaturalnych plamaŭ. 

U vypadku, kali była pralitaja ahresiŭnaja vadkaść, pryładu lepiej adnieści śpiecyjalistam, jakija pravierać stan unutranych kampanientaŭ i pačyściać ich ad brudu, jaki zastaŭsia ŭ korpusie. Tolki tak možna być upeŭnienym, što ŭ noŭtbuku nie budzie adbyvacca praces karozii. 

5. Hałoŭny punkt

Biezumoŭna, usie pieraličanyja vyšej punkty budzie karysna trymać u hałavie. Ale jašče karyśniej budzie trymać vadkaści jak maha dalej ad noŭtbuka: nie picie pobač ź im, nie kładzicie jaho ŭ adnuju torbu z butelkami i termasami, nie karystajciesia ŭ vannaj. Tolki heta moža harantavać zachavańnie vašych hrošaj, niervaŭ i času.

Materyjał padrychtavany pry padtrymcy Servisnaha centra «Praŭša»

Pavialičyć

• 0
• 0
• 0
• 0
• 0
• 0
• 0
• 0