Kali žančyny stanoviacca Žannami d'Ark: Aviesta Chabur i Baryn Kobani 

U vajny, jak viadoma, nie žanočaje abličča. Tradycyjna prastora žančyny akreślivajecca domam, dziećmi, chatnimi spravami, vychavańniem, škołaj (tak, u Biełarusi žančyny składajuć zvyš 85% nastaŭnikaŭ), śfieraj mody, dyzajnu. Adnak u adkaznyja histaryčnyja momanty niaredka byvaje, što mienavita žančyny viaduć napierad.

Viadomy prykład Žanny d'Ark, što ŭratavała Francyju padčas Stohadovaj vajny z Anhlijaj. Albo irłandskaj sufražystki Kanstancyi Markievič (Hor-But), što zmahałasia z brytanskimi impieryjalistami padčas Vialikodnaha paŭstańnia 1916 hoda. Ci słavutych uradženak Biełarusi Emilii Plater i Sofji Kavaleŭskaj u 19 stahodździ: pieršaja ŭznačalvała atrad paŭstancaŭ u 1831 hodzie, a druhaja mužna abaraniała pravy žančyn i stała pieršym prafiesaram matematyki žanočaha połu ŭ śviecie. Ci baraćbitak časoŭ Druhoj suśvietnaj vajny: uradženki Biełarusi doktarki Zinaidy Tusnałobavaj-Marčanki i filipinskaj partyzanki Ńjevies Fiernandes. Ci našaj sučaśnicy pakistanskaj dziaŭčyny Małały Jusufzaj — pravaabaroncy, jakaja mužna vystupiła suprać pryhniotu žančyn, a paśla pieražyła zamach, paśla jakoha ledźvie vyžyła. Jana atrymała Nobieleŭskuju premiju miru ŭ 2014 hodzie.

Padziei apošnich tydniaŭ [na žal, sumnyja] raspaviadajuć nam pra hieraiń kurdskaha supracivu.

Kurdy — vialiki narod na Blizkim Uschodzie, padzieleny pamiž Turcyjaj, Irakam, Siryjaj i Iranam. Paśla Pieršaj suśvietnaj vajny razhladałasia pytańnie ab pryznańni niezaležnaj dziaržavy kurdaŭ na abłomkach Asmanskaj impieryi. Adnak tady kurdy nie atrymali padtrymki, bo mieli sajuźnickija adnosiny ź Niamieččynaj, što prajhrała ŭ vajnie, a Turcyja na čale z Mustafoj Kiemalem znajšła sajuźnika ŭ asobie Savieckaj Rasii i razhramiła kurdaŭ.

Mužny kurdski narod cełaje stahodździe nie spyniaje baraćby za niezaležnaść. Turki z časoŭ Mustafy Kiemala i da siońnia žorstka pieraśledujuć kurdaŭ i navat zabaraniajuć im nazvacca svaim ułasnym imiem, ale tolki «hornymi turkami». U 1930—40-ja hady nacyjanalnaje paŭstańnie pryviało da stvareńnia niezaležnych kurdskich respublik na poŭnačy Iraka i paŭnočnym zachadzie Irana, na čale paŭstańnia stajaŭ Mustafa Barzani. Tady Saviecki Sajuz niejki čas padtrymlivaŭ kurdaŭ, ale paźniej, kali Druhaja suśvietnaja vajna skončyłasia i savieckija vojski vyjšli z zaniataha imi Paŭnočnaha Irana, saviety kurdaŭ zdali i siły Barzani byli razhromleny.

Adnak u 1990-ja hady paśla praciahłaj baraćby z režymam Sadama Chusiejna kurdy Iraka dasiahnuli narešcie aŭtanomii. Heta dapamahło kurdam u lipieni 2014 hoda dać supraciŭ terarystyčnaj «Isłamskaj dziaržavie». Tady jany byli patrebny, bo irakskaja i siryjskaja armii śpiešna reciravalisia pierad isłamistami. Ale Turcyja i tady časam bambiła kurdskija bazy.

Chvaravita ambicyjny prezident Turcyi Erdahan na hetym nie spyniŭsia. Da sapraŭdnaj vajny suprać kurdaŭ na poŭnačy Siryi turki pierajšli 19 studzienia 2018 hoda, kali pahroza ad isłamistaŭ stała minimalnaj.

Mnohija čuli pra tureckaje nastupleńnie na kurdski rajon Afryn u Siryi. Kurdy akazvajuć mužny supraciŭ akupantam. Razharelisia bai. Z abodvuch bakoŭ zahinuła ŭžo da 500 čałaviek. Niahledziačy na istotnuju pieravahu ŭ žyvoj sile i technicy (tanki, samaloty, artyleryja), turki prasunulisia ŭhłyb kurdskaha rajona zusim niaznačna. Prajaŭlajecca hłybokaja mužnaść i patryjatyzm, vajskovy dośvied kurdaŭ, nazapašany ŭ bajach z «Isłamskaj dziaržavaj».

Uražvajuć svajoj hieraičnaj samaachviarnaściu kurdskija dziaŭčaty, što achviarujuć svaim žyćciom u bajach z turkami i isłamistami.

28 studzienia bajec žanočaha adździeła YPG (Atrady narodnaj samaabarony) Aviesta Chabur (Avesta Khaboor, 1998—2018) u bai kala pasiołka Chiemam padarvała hranataj turecki tank, sama pry hetym zahinuła. Podźvih Aviesty Chabur dazvoliŭ bajavym tavaryšam zatrymać turak na podstupach da pasiołka.

A 31 studzienia turki sustreli žorstki adpor z boku žanočaha atrada. Jak paviedamlaje kurdskaje infarmacyjnaje ahientstva Rudaw, padčas boju turki i ich sajuźniki isłamisty paranili i zachapili ŭ pałon Baryn Kobani (Barin Kobani, 1995—2018). Jana taksama była viadomaja jak mužnaja zmaharka suprać isłamistaŭ i da apošniaha abaraniała svaju pazicyju. Isłamisckija bajeviki žorstka zabili kurdskuju hierainiu i nie pasaromiełasia vystavić fota jaje źniaviečanaha cieła ŭ internet.

Uvohule, u šerahach kurdskaj samaabarony ŭ Siryi vajuje da dziesiaci tysiač žančyn, hetym kurdskija atrady roźniacca ad arabskich armij. 

• 0
• 0
• 0
• 0
• 0
• 0
• 0
• 0