Šerah biełaruskich pravabarončych arhanizacyj 17 lipienia padpisalisia pad zvarotam da kiraŭnika krainy, u jakim prosiać pamiłavać palitviaźnia Michaiła Žamčužnaha, što adbyvaje pakarańnie ŭ PK №9 u Horkach i vyzvalić jaho ad dalejšaha adbyvańnia pakarańnia.
«Žamčužny Michaił Iharavič — zasnavalnik likvidavanaj u 2015 hodzie pravaabarončaj ustanovy «Płatform Inavejšn», asudžany da pazbaŭleńnia voli na 6 hadoŭ 6 miesiacaŭ prysudam sudovaj kalehii pa kryminalnych spravach Viciebskaha abłasnoha suda ad 10 lipienia 2015 z ulikam źmianieńniaŭ, uniesienych u prysud sudovaj kalehijaj Viarchoŭnaha suda ad 23 kastryčnika 2015 h. M. Žiemčužnyj pryznany vinavatym u ździajśnieńni złačynstvaŭ pa č. 5 art. 16, č.1 art. 375, č.1 i č.2 art. 376, č. 1 i č. 2 art. 431 KK Respubliki Biełaruś.
My, pradstaŭniki pravaabarončaj supolnaści Biełarusi, aceńvajučy raźbiralnictva spravy ŭ sudzie, zajavili pra toje, što pazbaŭleńnie voli Michaiła Žamčužnaha było ŭžyta ŭ parušeńnie prava na spraviadlivaje sudovaje raźbiralnictva, harantavanaje artykułam 60 Kanstytucyi Respubliki Biełaruś i artykułam 14 Mižnarodnaha pakta ab hramadzianskich i palityčnych pravach; było zasnavana na abvinavačańniach spravakavanych pradstaŭnikami dziaržavy, a značyć - nie źjaŭlajucca złačynnymi dziejańniami. U toj ža čas praciahłaść i ŭmovy pazbaŭleńnia voli abranyja vidavočna niepraparcyjna pravaparušeńniu, u jakim asoba pryznanaja vinavataj.
Hetyja abstaviny dazvalajuć nam ličyć M. Žamčužnaha palityčnym źniavolenym na asnovie Kiraŭnictva pa vyznačeńni paniaćcia «palityčny viazień», raspracavanaha ŭ tym liku na asnovie sfarmulavanych Parłamienckaj Asamblejaj Savieta Jeŭropy kryteraŭ (rezalucyja PASIE № 1900 (2012).
U suviazi z hetym my patrabavali nieadkładnaha pierahladu pryniataha ŭ dačynieńni da Michaiła Žamčužnaha sudovaha prysudu pry zachavańni prava na spraviadlivaje sudovaje raźbiralnictva i likvidacyi nazvanych vyšej faktaraŭ.
Da ciapierašniaha času prysud nie pierahledžany.
Źniavoleny M. Žamčužny adbyŭ užo kala čatyroch hadoŭ (try hady i dzieviać miesiacaŭ) z pryznačanaha sudom pakarańnia. Źjaŭlajučysia asobaj piensijonnaha ŭzrostu, M. Žamčužny adčuvaje ŭ źniavoleńni dadatkovyja pakuty, akramia abumoŭlenych samim faktam pazbaŭleńnia voli.
Chočam źviarnuć uvahu na toje, što choć M. Žamčužny i źjaŭlajecca złosnym parušalnikam ustanoŭlenaha režymu adbyćcia pakarańnia, ale ŭsie parušeńni apošniaha času źviazanyja z aściarohaj stać achviaraj niefarmalnych adnosinaŭ, jakija skłalisia siarod źniavolenych pry papuščalnictvie administracyi papraŭčaj ustanovy, što, u svaju čarhu, rasceńvajecca nami jak forma žorstkaha i biesčałaviečnaha abychodžańnia sa źniavolenym.
Asudžeńnie i ŭmovy adbyćcia pakarańnia Michaiłam Žamčužnym stali pradmietam abmierkavańnia na pasiadžeńni Kamiteta suprać katavańniaŭ AAN u traŭni 2018 hoda padčas pradstaŭleńnia piataha Pieryjadyčnaha dakładu Biełarusi. Svaju zakłapočanaść situacyjaj, jakaja skłałasia ŭ dačynieńni da M. Žamčužnaha, taksama nieadnarazova vykazvali pradstaŭniki mižnarodnych i pravaabarončych arhanizacyj, u tym liku Jeŭrapiejski parłamient i Kamitet suprać katavańniaŭ.
U suviazi z hetym, kirujučysia pryncypami humanizmu i spraviadlivaści, My, pradstaŭniki pravaabarončych arhanizacyj, źviartajemsia z prośbaj ab pamiłavańni Žamčužnaha Michaiła Iharaviča i vyzvaleńni jaho ad dalejšaha adbyćcia pakarańnia, adznačajecca ŭ zvarocie.
Były ministr kultury Rusłan Čarniecki znajšoŭ sabie padpracoŭku9
Kamientary