Prakuratura vobłaści nakiravała ŭ abłasny sud kryminalnuju spravu ab zabojstvie z asablivaj žorstkaściu. Žychar Śvietłahorska ŭ paryvie reŭnaści źbiŭ sužycielku. Žančyna pamierła ŭ balnicy, paviedamlaje «Homielskaja Praŭda».
Zdaryłasia biada 22 krasavika.
Jany žyli razam kala šaści hadoŭ, apošnija piać ź jakich žančyna nidzie nie pracavała. Mužčyna ž pracavaŭ na budaŭničych abjektach Biełarusi, adjazdžaŭ u kamandziroŭki na praciahły čas. Napiaredadni zabojstva jon patelefanavaŭ žančynie i papiaredziŭ, što nie pryjedzie. Adnak paźniej u toj samy dzień daviedaŭsia, što znajomyja jeduć u Śvietłahorsk i mohuć padvieźci. Vyrašyŭ jechać ź imi.
Pa darozie mužčyna vypiŭ čarku harełki. Pryjechaŭšy dadomu, jon prajšoŭ na kuchniu, dzie i zaśpieŭ pjanuju sužycielku ź inšym. Uźnik kanflikt, i nieznajomiec pavoli pajšoŭ, pakinuŭšy sužycielaŭ vyśviatlać adnosiny sam-nasam. Pavodle słovaŭ abvinavačanaha, u zapale jon niekalki razoŭ udaryŭ žančynu dałońniu pa tvary, a zatym kułakom u śpinu, z-za čaho jana ŭpała i ŭdaryłasia hałavoj. Pakul sužycielka lažała na padłozie, jon udaryŭ jaje nahoj u žyvot i syšoŭ padychać śviežym pavietram.
Viarnuŭšysia, mužčyna znajšoŭ žančynu na padłozie kuchni ŭ toj ža pozie i vyrašyŭ, što jana śpić. Kala 12-j hadziny nočy patelefanavaŭ znajomaj, kab taja zabrała svaju siabroŭku. Jana sapraŭdy pryjšła, ubačyła nieprytomnuju žančynu na padłozie ŭ kryvi i vyklikała chutkuju. Sužyciel pavodziŭ siabie abyjakava.
Paciarpiełuju špitalizavali ŭ krytyčnym stanie, praz dva dni jana pamierła ŭ špitali. Pryčyna śmierci - zakrytaja čerapna-mazhavaja traŭma. Jak vyśvietliła ekśpiertyza, žančynie było naniesiena nie mienš za 53 udary, 14 ź jakich - u vobłaść hałavy.
Dziejańni abvinavačanaha kvalifikavanyja jak zabojstva z asablivaj žorstkaściu. Svaju vinu mužčyna pryznaje častkova.
Ciapier spravu pieradali ŭ sud. Abvinavačanamu pahražaje ad 8 da 25 hadoŭ pazbaŭleńnia voli, albo pažyćciovaje, albo śmiarotnaje pakarańnie.
Kamientary