«Uśmieška kapitalista z voŭčym aščeram». Dziesiać tezisaŭ z prahramnaha artykuła staršyni KDK Leanida Anfimava

Staršynia Kamiteta dziaržaŭnaha kantrolu Leanid Anfimaŭ apublikavaŭ na staronkach «Sovietskoj Biełoruśsii» prahramny artykuł «Jakimi nam być». Anfimaŭ vystaŭlaje siabie praciŭnikam jakich-kolviek rynkavych reformaŭ. Jon chvalić stabilnaść i z nastalhijaj uzhadvaje časy płanavaj ekanomiki.

«Naša Niva» vyłučyła dziesiać asnoŭnych tezisaŭ Leanida Anfimava.

Pavialičyć

1. Ja z uzdryham dumaju, što było b z krainaj, kali b razdali ŭ pryvatnuju ŭłasnaść abo začynili nieefiektyŭnyja pradpryjemstvy. Mnohija krainy paddalisia na hetyja «parady i rekamiendacyi» i pazbavilisia nacyjanalnych ekanomik i ekanamičnaj samastojnaści.
2. Kapitalisty buduć vam uśmichacca, abiacać załatyja hory, ale heta buduć uśmieški z voŭčym aščeram.
3. U nacyjanalnyja ekanomiki ŭvajšli sa svaimi intaresami transnacyjanalnyja kampanii raźvitych krain. Jany adyhrali rolu trajanskaha kania, faktyčna źniščyŭšy pa adzinočcy bolš słabyja miascovyja pradpryjemstvy. A pazbaviŭšysia ekanamičnaj samastojnaści, pazbaŭlajucca palityčnaj niezaležnaści. I vam buduć užo nie rekamiendavać, a ŭkazvać: jak žyć, z kim siabravać, kaho abirać va ŭładu. I ŭžo nie narod budzie abirać: usio budzie dyktavacca zvonku.
4. Šmat ekanomik zastałosia va Uschodniaj Jeŭropie, intehravanaj u Jeŭrasajuz?! Raz, dva i abličyŭsia. Polšča, Čechija, Słavakija jašče niejak zmahajucca. Los našych najbližejšych susiedziaŭ — byłych respublik SSSR — jašče nie zajdrośniejšy. Choć toj-sioj i sprabuje ich u jakaści prykładu supraćpastaŭlać Biełarusi: u ich, maŭlaŭ, i siaredniaja zarpłata vyšejšaja, i piensija bolšaja, i nas jany vučać rozumu. A ŭ samich pałova nasielnictva raźbiehłasia pa zachodnich dziaržavach u pošukach lepšaj doli, bo doma rabić niama čaho.
5. Ja nie razumieju, čamu kamuści karcić razburyć toje, što zabiaśpiečvaje spakoj i stabilnaść, napeŭna, adzinaj na postsavieckaj prastory krainy. Ekśpierymienty ŭ śfiery hramadska-ekanamičnych adnosin zanadta doraha abychodziacca dziaržavam. U luboha razvažnaha palityka ruka nikoli nie padymiecca nacisnuć na knopku, jakaja zapuskaje miechanizm hetaha ekśpierymientu.
6. Kamuści nie padabajecca kurs na strymlivańnie maštabnaha raździaržaŭleńnia i pryvatyzacyi. A ci moža chto z daradcaŭ i ekśpiertaŭ adkazać na pytańnie: što heta daść ekanomicy?! Za košt čaho budzie zabiaśpiečany nadumany roskvit pryvatyzavanych abo vyviedzienych z-pad apieki dziaržavy pradpryjemstvaŭ? Razvahi pra źjaŭleńnie efiektyŭnaha ŭłaśnika — pustyja.
7. Vyjści ŭ internet i kinuć tam klič «Daješ reformy!» — vialikaha rozumu nie treba. A jakija reformy siońnia patrebnyja hramadstvu? Atrymać mahčymaść ciahać u parłamiencie adno adnaho za čuby abo ŭ žyvym efiry telebačańnia vypluchnuć apanientu ŭ tvar šklanku vady?! Dyk dla hetaha reformy nie patrebnyja. Durniaŭ i bieź ich chapaje — tolki vypuści na trybunu.
8. U chatniaj haspadarcy my nie addajem usio na volu vypadku i nie žyviom adnym dniom. Haspadar biznesu taksama ŭmiešvajecca ŭ padziei i rehuluje situacyju. Tak pavinna być i ź dziaržaŭnaj ułasnaściu, bo dziaržava taki samy ŭłaśnik.
9. Ideja płanavaj ekanomiki apiaredziła čas! Usie pradpryjemstvy pracavali ŭ ciesnaj kaapieracyjnaj źviazcy. Kožny viedaŭ, što vyrablać i kolki. Nie było prablem sa zbytam pradukcyi. Hrošy biezdakorna vykonvali svaju złučnuju funkcyju pamiž popytam i prapanovaj.
10. Siońnia refarmavańnie ekanomiki krainy — heta nie hałoŭnaja zadača. Reformy patrebnyja, ale nie ŭ śfiery ekanamičnych adnosin praź pieraraźmierkavańnie ŭłasnaści ad dziaržavy pryvatniku. Pierš za ŭsio jany pavinny zakranuć adnosiny ludziej da pracy. Ź nieba ničoha nie ŭpadzie. Hałoŭnaja reforma pavinna adbycca ŭ mazhach. Kab my sami narešcie zrazumieli, što naša ščaście ŭ našych ža rukach i nichto jaho z-za mora nam nie pryniasie, tam svaich prablem chapaje. Ale zaŭsiody znojducca achvotnyja na časovych ciažkaściach padstavić padnožku, kab nie mulali vočy svajoj stabilnaściu i spakojem.

Leanid Anfimaŭ

Naradziŭsia ŭ 1954 u siale Sima Jurjeŭ-­Polskaha rajona Uładzimirskaj vobłaści Rasii. Skončyŭ Biełaruski politechničny instytut (1977), Narhas (1988). Pracavaŭ instruktaram pramysłova­-transpartnaha adździeła Zavodskaha rajkama KPB, hienieralnym dyrektaram vytvorčaha abjadnańnia «Dyzajn». Ad 1991 da 2001 pracavaŭ u Minharvykankamie. Potym sychodziŭ u KDK, paśla čaho znoŭ viartaŭsia ŭ Minharvykankam. Z krasavika 2006 — namieśnik kiraŭnika Administracyi prezidenta. U śniežni 2010 staŭ namieśnikam staršyni KDK. Ad kastryčnika 2014 — staršynia KDK.

Čytajcie taksama: Ad pastucha da hałoŭnaha pastucha krainy: piać faktaŭ pra Leanida Anfimava

• 0
• 0
• 0
• 0
• 0
• 0
• 0
• 0