Hałasiejeŭski rajonny sud Kijeva prysudziŭ Barysa Hiermana, jaki abvinavačvaŭsia ŭ arhanizacyi sproby zabojstva ŭ Kijevie rasijskaha žurnalista Arkadzia Babčanku, da 4,5 hoda pazbaŭleńnia voli, paviedamiŭ kiraŭnik Słužby biaśpieki Ukrainy Vasil Hrycak.
«Tak, hetaja infarmacyja adpaviadaje rečaisnaści. 30 žniŭnia hetaha hoda Hałasiejeŭski rajonny sud Kijeva pryznaŭ vinavatym hramadzianina Barysa Hiermana ŭ tym, u čym jon abvinavačvaŭsia. Jamu pryznačany realny termin pakarańnia — 4 hady i 6 miesiacaŭ pazbaŭleńnia voli», — skazaŭ Hrycak žurnalistam u subotu ŭ Kijevie, kali adkazvaŭ na pytańnie ahienctva «Interfaks-Ukraina».
Pa słovach kiraŭnika SBU, prysud ustupić u siłu praź miesiac.
Kiraŭnik SBU udakładniŭ, što Hierman pajšoŭ na ździełku sa śledstvam, całkam pryznaŭ svaju vinu.
«Supracoŭničaje sa śledstvam, daje vielmi cikavyja pakazańni, jakija nami ŭ dalejšym buduć praviaracca i dakumientavacca», — adznačyŭ Hrycak.
Jak paviedamlałasia, ŭviečary 29 traŭnia spačatku ŚMI, zatym i ŭłady Ukrainy paviedamili, što rasijskaha žurnalista Arkadzia Babčanku, jaki z 2017 hoda pracuje na telekanale ATR u Kijevie, nibyta zastrelili na leśvičnaj kletcy jaho doma ŭ Kijevie. Na nastupny dzień kiraŭnik SBU zajaviŭ, što infarmacyja pra «zabojstva» Babčanki była častkaj śpiecapieracyi ŭkrainskich śpiecsłužbaŭ, nakiravanaj na praduchileńnie zamachu na žurnalista, a sam Babčanka vyjšaŭ da prysutnych na bryfinh pradstaŭnikoŭ ŚMI.
U toj ža dzień stała viadoma pra zatrymańnie arhanizatara «zabojstva» Babčanki — Barysa Hiermana, jaki prapanavaŭ svajmu znajomamu ŭdzielniku bajavych dziejańniaŭ na Danbasie $30 tysiač. I pieradaŭ jamu častku sumy za niepasrednaje vykanańnie złačynstva, na što toj pahadziŭsia.
Nieŭzabavie manach-vałancior, aktyvist «Pravaha siektara» Alaksiej Cymbaluk paviedamiŭ, što źjaŭlajecca tym čałaviekam, jakomu zamovili zabojstva Babčanki, paśla čaho jon źviarnuŭsia ź infarmacyjaj u SBU.
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran
Kamientary