Były kiraŭnik MZS Polščy Radasłaŭ Sikorski ŭ svajoj knizie «Polšča moža być lepšaj» nazvaŭ byłoha pavieranaha ŭ pasolstvie Polščy ŭ Minsku Vitalda Juraša «prafiesijnym špijonam». Sam Juraš na partale Onet.pl adreahavaŭ na hetaje śćvierdžańnie byłoha ministra vialikim artykułam.
Vitald Juraš piša, što kali b heta było praŭdaj, to jon by nie saromieŭsia hetaha, adnak uchilajecca ad adkazu na pytańnie, ci byŭ jon ahientam polskich śpiecsłužbaŭ.
«Prablema zaklučajecca ŭ tym, što fakt pracy ci supracoŭnictva z vyviedkaj padpadaje pad dziaržaŭnuju tajnu z najvyšejšaj kłasifikacyjaj — całkam sakretna. Havoračy ab tym, što ja zajmaŭsia «špijonskaj dziejnaściu», ministr Sikorski albo napisaŭ niapraŭdu, albo raskryŭ dziaržaŭnuju tajamnicu, što źjaŭlajecca złačynstvam»,
— piša Juraš.
Juraš pracavaŭ, jak jon piša, u dyppradstaŭnictvach «ŭ krainie, jakaja ličycca najbolšaj pahrozaj nacyjanalnaj biaśpiecy Polščy, i krainie, jakaja sama ličyć Polšču najbolšaj niebiaśpiekaj sabie». Majucca na ŭvazie Rasija i Biełaruś. U Minsku ŭ pieryjad biespasłoŭja Juraš niejki čas vykonvaŭ funkcyi časovaha pavieranaha ŭ spravach Polščy, h.zn. padmianiaŭ pasła.
Juraš nazyvaje miemuary Sikorskaha biezadkaznymi, bo, na jahonuju dumku, jany mohuć pastavić pad udar ludziej, jakija kantaktavali ź im u Maskvie i Minsku. Juraš adznačaje aktyŭnuju pracu rasijskaj i biełaruskaj kontrraźviedak.
Juraš, siarod inšaha, apisvaje typovyja pavodziny dypłamataŭ, jakija adnačasova pracujuć na śpiecsłužby. Paśla zvyčajnaj sustrečy dvuch takich dypłamataŭ za abiedam u ich dziaržavy laciać dźvie šyfroŭki, piša jon: adna ŭ zamiežnapalityčnaje viedamstva — pra fakty, jakija jon pačuŭ u časie hutarki, i druhaja — u raźviedku, z charaktarystykaj taho piersanaža, ź jakim jon abiedaŭ. I toje samaje z druhoha boku.
Juraš uzhadvaje pra niekatoryja sakretnyja apieracyi polskaj dypłamatyi ŭ Livii, dzie jahony baćka byŭ pasłom, — tam palaki pry kancy 2000-ch udzielničali ŭ hulniach Zachadu z režymam Kadafi z metaj pierakanać jaho admovicca ad chimičnaj zbroi. A taksama ŭ Iraku — pryčym polskija dypłamaty, jakija tam pracavali, dziŭnym čynam usie zahinuli nieŭzabavie.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam3030
Kamientary