Alena Anisim: Ja nie sparynh-partnior Łukašenki, mahu atrymać da 40% hałasoŭ

Deputat Pałaty pradstaŭnikoŭ, staršynia Tavarystva biełaruskaj movy imia Franciška Skaryny Alena Anisim 30 studzienia zajaviła pra namier udzielničać u prezydenckich vybarach 2020 hoda. U novym interviju Radyjo Svaboda jana raskazvaje, u adkaz na što pryniała rašeńnie iści na vybary i na jaki vynik raźličvaje.

— Na padtrymku jakich słajoŭ biełaruskaha hramadztva vy raźličvajecie?

— Ja raźličvaju, u pieršuju čarhu, na ŭsich patryjatyčna nastrojenych hramadzian Respubliki Biełaruś, niezaležna ad ich nacyjanalnaści. Usich, chto zakłapočany losam našaj krainy i perspektyvaj jaje raźvićcia.

Voś jakraz u dzień, kali ja zajaviła pra hatoŭnaść udzielničać u prezydenckich vybarach, ja atrymała ŭ svaim FB takoje paviedamleńnie. Čałaviek napisaŭ: «Dziakuj, nia ŭdzielničaŭ u prezydenckich vybarach z časoŭ Paźniaka, a zaraz zadumaŭsia».

— Rytoryka hałoŭnaha kandydata na prezydenckich vybarach, Alaksandra Łukašenki, taksama ŭ značnaj stupieni niezaležnickaja. Jon taksama kaža, što baronić niezaležnaść, i što z boku Rasiei isnuje pahroza. Adpaviedna, vy budziecie hrać na adnym palityčnym poli. Vas takaja kankurencyja nie pałochaje i nie biantežyć?

— Mianie heta nie pałochaje i nie biantežyć. Heta vielmi važna, kali ŭsie pretendenty na samuju vysokuju pasadu ŭ systemie palityčnaj ułady ŭ Biełarusi buduć trymacca niezaležnickaj pazycyi, buduć vyznačać dziaržaŭnaść našaj krainy, jaje samastojnaje isnavańnie i ŭmacavańnie jak kaštoŭnaść.

— U razvahach palityčnych analitykaŭ možna pačuć dumku i pra taki varyjant raźvićcia padziejaŭ, kali apazycyja zdymie ŭsich kandydataŭ, kab Alaksandar Łukašenka zastaŭsia adzin. U takim vypadku kiraŭniku Biełarusi patrebny sparynh-partner. Ci nie baiciesia abvinavačańnia ŭ tym, što vy možacie stać sparynh-partneram Łukašenki? I ci nia zdymiecie vy svaju kandydaturu, kali apazycyja vyrašyć nikoha nie vystaŭlać abo źniać svajho kandydata (kandydataŭ)?

— Ja abviaściła ab svaim namiery ŭdzielničać u nastupnych prezydenckich vybarach nie tamu, što mnie niama čym zaniacca, i nie tamu, što mnie niechta abiacaje niejkuju vysokuju pasadu ci hrošy. Ja idu tamu, što baču realnuju pahrozu isnavańniu našaj niezaležnaj dziaržavy.

Heta źviazana z tymi publikacyjami, u jakich robiacca napadki na mianie i maju arhanizacyju. Tamu ja ŭspryniała hetyja publikacyi jak asabisty vyklik mnie i ŭsim patryjatyčna nastrojenym hramadzianam. Tut, jak kažuć, abo vy prymajecie vyklik i hodna adkazvajecie na jaho, abo vy adsiedžvajeciesia ŭ kustach — i tady vas niama, i vašaj krainy niama.

Mova tut idzie pra publikacyi na sajtach teleskop-by.org i Eadaily.com. Spasyłku na adnu z hetych publikacyj ja źmiaściła ŭ svaim FB, dzie taksama dała adkaz na tyja napadki.

— Na jaki realny vynik prezydenckich vybaraŭ vy raźličvajecie? Što planujecie atrymać na vychadzie?

— Čas pakaža. Vynik moža być rozny ŭ zaležnaści ad sytuacyi. Siońnia, kaniečnie, raźličvać na pieramohu nie davodzicca. Ale vybary adbuducca bolš čym praz hod, i kali praca budzie pastaŭlena dobra, to vynik moža być nia mienš jak 40 pracentaŭ.

— U Biełarusi dźvie dziaržaŭnyja movy. Na jakoj movie budzie vieścisia vaša pieradvybarčaja kampanija?

— Maja kampanija, biezumoŭna, budzie vieścisia na biełaruskaj movie. Hetak ža, jak ja viała svaju kampaniju padčas vybaraŭ u Pałatu pradstaŭnikoŭ Nacyjanalnaha schodu Respubliki Biełaruś.

Piać faktaŭ pra deputatku Alenu Anisim, jakaja vyrašyła pajści ŭ prezidenty

• 0
• 0
• 0
• 0
• 0
• 0
• 0
• 0