Stali viadomyja padrabiaznaści pra zatrymanych u Polščy ahientaŭ biełaruskich śpiecsłužb, jakija zdymali apazicyjnyja akcyi
Nacyjanalnaja prakuratura Polščy i pres-sakratar ministra-kaardynatara śpiecsłužbaŭ Jacak Dabžynski padzialilisia padrabiaznaściami pra zatrymanych Ahienctvam unutranaj biaśpieki biełarusa i palaka, jakija zdymali na videa akcyi biełarusaŭ u Varšavie, piša REFORM.news.
Jak paviedamili ŭ prakuratury, zatrymanaha hramadzianina Biełarusi zavuć Alaksiej B., a hramadzianina Polščy — Rafał H.
Biełarusu 19 hadoŭ, u Polščy jon znachodzicca lehalna, pracavaŭ u Varšavie aficyjantam.
Zatrymanym vysunuta abvinavačańni ŭ dziejańniach u intaresach zamiežnaj raźviedki ŭ 2024—2025 hadach u Varšavie i inšych miescach krainy.
«Jak minimum ź minułaj vosieni jany jeździli tut, u Varšavie, na roznyja mierapryjemstvy biełaruskaj mienšaści, uklučajučy pratesty, fiestyvali. Tam, padkreślivaju, pa ŭkazańni biełaruskich śpiecsłužbaŭ jany fatahrafavali ŭdzielnikaŭ, zdymali videa i pierasyłali ich praz uschodniuju miažu, kab biełaruskija śpiecsłužby, słužby Łukašenki, vykarystoŭvali ŭ svaich karyślivych metach, i, viadoma ž, u prapahandysckich metach. Varta adznačyć, što ŭ suda nie było sumnievaŭ. Tamu pa rašeńni suda, 19‑hadovy biełarus, jaki zakonna pražyvaŭ u krainie, pracavaŭ tut, u Varšavie, aficyjantam, praviadzie nastupnyja try miesiacy pad vartaj», — skazaŭ Jacak Dabžynski ŭ efiry TVPinfo.
Polski hramadzianin, jak paviedamlałasia, zastajecca na voli, pad palicejskim nahladam, jamu zabaronieny vyjezd z krainy, u jaho zabrali pašpart.
Pavodle infarmacyi Nacyjanalnaj prakuratury Polščy, u miežach rasśledavańnia ŭžo byli zatrymany piać čałaviek, u tym u liku troje hramadzian Biełarusi i dvoje — Ukrainy.
Troje padazravanych znachodziacca pad vartaj ź listapada 2025 hoda, adzin źmieščany ŭ centr utrymańnia niepaŭnaletnich, adzin z padazravanych pamior.
Dziejnaść padazravanych kaardynavałasia praz Telegram. Apłatu jany atrymlivali ŭ kryptavalucie.
Akramia zdymki mierapryjemstvaŭ biełarusaŭ, taksama viałasia zdymka abjektaŭ «krytyčnaj infrastruktury i inšych miescaŭ, jakija majuć vyrašalnaje značeńnie dla biaśpieki dziaržavy i jaje hramadzian».
«Atrymanyja takim čynam materyjały paśla vykarystoŭvalisia biełaruskim režymam u prapahandysckich metach», — havorycca ŭ paviedamleńni prakuratury.
Kamientary
a potym departacyja.
Kali b heta było b u jakoj Brytanii, uvohule b nie zatrymali. Bo zdymki ludziej u hramadzkim miescy nia mohuć być kvalifikavany jak złačynstva.