U ofis telekanała «Biełsat» u Minsku na vulicy Kastryčnickaj pryjšli milicyjanty rabić pieratrus, paviedamlaje BAŽ.
Jak raspavioŭ Tut.by supracoŭnik «Biełsata» u Biełarusi Alaksiej Minčonak, pieratrus prachodzić u ramkach rasśledavańnia spravy pa artykule 188 Kryminalnaha kodeksu - paklop.
— Ja mała viedaju, ale viedaju, što sprava tyčycca adnoj z našych navinaŭ pra «spravu miedykaŭ».
Pa stanie na 11.00 u dvary kala ofisa «Biełsata» sabralisia niekalki žurnalistaŭ telekanała i inšych ŚMI. U padjeździe prosta za dźviaryma staić siaržant milicyi, jaki skazaŭ, što ŭ jaho zahad nie prapuskać nikoha, akramia žycharoŭ, bo ŭ budynku viaducca śledčyja dziejańni.
Pa słovach žurnalista «Biełsata» Alesia Zaleŭskaha, pieratrus amal napeŭna źviazany z kryminalnaj spravaj ab paklopie, jakuju zaraz rasśleduje Śledčy kamitet.
Uletku Zaleŭski padrychtavaŭ videasiužet ab karupcyi ŭ Ministerstvie achovy zdaroŭja, dzie paviedamlałasia ab zatrymańni kiraŭnika dziaržpradpryjemstva «Miedtechnacentr» Aleha Švieda.
Ale tekstavaja viersija na sajcie telekanału nie adpaviadała videa. U tekście paviedamlałasia, što zatrymany nie tolki Aleh Švied, ale i jaho brat Andrej, kiraŭnik Dziaržkamiteta sudovych ekśpiertyz.
— My adrazu, jak zaŭvažyli, dali abviaržeńnie, vypravili pamyłku. Ale Andrej Švied napisaŭ zajavu na imia Šunieviča — pryciahnuć mianie da adkaznaści pa dvuch kryminalnych artykułach — paklop i dyskredytacyja dziaržaŭnych orhanaŭ.
Pa słovach Zaleŭskaha, jaho zatym pačała ŭzmocniena praviarać padatkovaja. U listapadzie Śledčy kamitet, pa słovach žurnalista, pastanaviŭ, što niama padstaŭ pačynać kryminalnuju spravu. Adnak u studzieni hetaha hoda minskaja prakuratura sama zaviała kryminalnuju spravu pa fakcie paklopu, dadaŭ Zaleŭski.
— Jany viarnuli spravu nazad u SK. I zaraz iduć usie pracesualnyja dziejańni nanoŭ. Tolki nas užo dapytvajuć jak śviedak, a nie prosta biaruć tłumačeńni. Užo byli dopyty na kamieru.
Pa słovach žurnalista, śledčyja zaraz šukajuć čałavieka, jaki vystaviŭ na sajt tekst pad videasiužetam.
— Jany rychtujuć adpaviednyja zapyty ŭ Varšavu. Tamu sprava moža praciahnucca niekalki miesiacaŭ.
Śviedkami prachodziać sam Zaleŭski, apieratar Alaksandr Lubiančuk, pradstaŭniki telekanała Alaksiej Minčonak i Iryna Słaŭnikava.
Čamu trasuć «Biełsat»? Telekanał napisaŭ pra zatrymańnie hienierała Švieda, a heta akazałasia niapraŭdaj
Jak vyhladaje ofis Biełsata paśla pieratrusu
Pieraściarohi pierad «novymi Žytkavičami». Kijeŭ darma bačyć pahrozu ŭ budaŭnictvie mastoŭ cieraz Prypiać i Muchaviec31
Pieraściarohi pierad «novymi Žytkavičami». Kijeŭ darma bačyć pahrozu ŭ budaŭnictvie mastoŭ cieraz Prypiać i Muchaviec
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ1818
Kamientary