Juryj Bondar staŭ hościem pieradačy «Ničoha asabistaha», jakuju viadzie kiraŭnik telekanała ANT Marat Markaŭ. Ministr kultury adkazaŭ, u tym liku, pra raźvićcio biełaruskaj movy.
Marat Markaŭ spasłaŭsia na vystup Alaksandra Łukašenki na «Vialikaj razmovie», pryśviečany biełaruskaj movie:
«Biełaruś ničoha nie straciła ad taho, što ŭ krainie dźvie dziaržaŭnyja movy. Tym nie mienš, biełaruskuju movu treba padtrymlivać. I my hetuju padtrymku bačym litaralna paŭsiul.
Mianiajucca nazvy vulic, bačym na biłbordach, navat ludzi z asałodaj nosiać majki ź biełaruskim arnamientam i nadpisami na biełaruskaj movie. Apošnija sustrečy pakazali, što niekatoryja susiedzi z zakłapočanaściu staviacca, što ŭ krainie padtrymlivajecca biełaruskaja mova, i ŭsprymajuć ledź nie jak prajavu nacyjanalizmu. U jakim kirunku hetaja padtrymka pavinna raźvivacca dalej?»
Na heta ministr adkazaŭ nastupnaje: «Heta ciažkoje pytańnie, jakoje lažyć u płoskaści hramadskaj śviadomaści, jakaja nie mianiajecca chutka. My tady zahavorym na biełaruskaj movie, kali adčujem u hetym patrebu. Adčujem patrebu zrabić vybar na karyść biełaruskaj movy. Revalucyj tut nie treba.
Ja kateharyčna suprać administracyjnych mieraŭ pa ŭkaranieńni biełaruskaj movy, my heta prajšli ŭ pačatku 1990-ch. Kali ja pracavaŭ va ŭniviersitecie, to ź cikavaściu znajšoŭ u rektarskim archivie dakumient ź Ministerstva kultury, dzie adznačałasia pastavić rektaru pad uvahu, što «vielmi marudna idzie ŭkaranieńnie biełaruskaj movy ŭ navučalny praces univiersiteta» [Bondar havaryŭ pa-rusku, ale hetuju frazu skazaŭ pa-biełarusku — «NN»].
Šokavaja terapija škodnaja i niekamfortnaja. Ja nie skažu, što ŭ nas u krainie mała robicca dla padtrymki biełaruskaj movy. Heta i biełaruskamoŭny repiertuar našych teatraŭ: Janki Kupały, Jakuba Kołasa, sučasnaj biełaruskaj dramaturhii, teatr junaha hledača. Jany majuć 100% repiertuara na biełaruskaj movie, pastanoŭki prachodziać pry poŭnym anšłahu».
U svaju čarhu Marat Markaŭ skazaŭ, što pastanaviŭ raz na miesiac pravodzić na ANT vypusk navin i ranišni efir na biełaruskaj movie, a ŭ pierśpiektyvie heta pašyryć. «A ci jość u Minkulta płan dla padtrymki vyrabu kina– i videakantentu na biełaruskaj movie?» — spytaŭ Markaŭ.
Na žal, adkazu na hetaje pytańnie tak i nie prahučała. Bondar zamiest słovaŭ pra padtrymku staŭ apieravać ličbami: «My niadaŭna padličvali, kolki ž stužak było vypuščana pa-biełarusku za apošnija 20 hadoŭ. Vyjšła kala 40%, uličvajučy animacyju, dakumientalnaje kino, mastackaje».
Kamientary