«Štučnaje dychańnie rabiła dačce sama». Maci pamierłaj u Turavie dziaŭčynki pra zdareńnie

Raptoŭnaja śmierć treciakłaśnicy Ani Ziamlanik z Turava, jakoj 17 maja stała drenna padčas školnaj spartyŭnaj viktaryny, pakul vyklikaje šmat pytańniaŭ. Mama dziaŭčynki Taćciana Ziamlanik była z dačkoj z taho momantu, jak joj raptam stała drenna, i amal da jaje śmierci — i raspaviała Tut.by, što zdaryłasia.

Taćciana pracuje nastaŭnikam u hetaj ža škole №2, dzie vučyłasia jaje Ania. Pa słovach žančyny, jašče za piać chvilin da pačatku spartakijady jana bačyła svaju dačku, jana ni na što nie skardziłasia i była viasiołaj. Usio jak zaŭsiody. A ŭžo praz chvilin 15 da Taćciany prybiehli dzieci: «Vašaj Ańcy drenna!».

— Ania kazała, što kružycca hałava, stračvała prytomnaść. Vyklikali chutkuju. Čakali. Chutkaja jechała 40 chvilin, choć stancyja zusim pobač, — raspaviadaje žančyna.

Kali mama z dačkoj apynulisia ŭ pryjomnym pakoi, lekary, kaža žančyna, taksama nie śpiašalisia.

— Nam nie zrabili ni kardyjahramu, ni UHD. Kropielnicu i toje šukali, chto b moh pastavić. Ania stračvała prytomnaść, prasiła pić — i ja sama rabiła joj štučnaje dychańnie. Praz hadzinu nas adpravili ŭ Žytkavičy, ale potym chutkuju viarnuli nazad u Turaŭ. Skazali, maŭlaŭ, vypała kropielnica. Paśla hetaha mianie z mašyny «paprasili». I nastupnuju hadzinu, da pryjezdu reanimatołahaŭ z Žytkavič, mianie da jaje ŭžo nie puskali, — uspaminaje Taćciana.

Nieŭzabavie Ania pamierła.

Taćciana kaža, što jaje dačka była zdarovaj, aktyŭnaj dziaŭčynkaj, zajmałasia tancami i nikoli nie skardziłasia na zdaroŭje.

— Svajo dzicia ja ŭžo nie viarnu. Ale nichto nie viedaje, što moža zdarycca ŭ nastupny raz. Raniej u nas była balnica ź dziciačym, chirurhičnym i inšymi adździaleńniami. Ale zaraz u horadzie z trochtysiačnym nasielnictvam — a jość jašče i nasielnictva navakolnych viosak! — ni śpiecyjalistaŭ, ničoha, — kaža Taćciana.

Turaŭskaja haradskaja balnica składajecca sa stacyjanara na 15 łožkaŭ siastrynskaha dohladu i palikliniki. U joj jość łabaratoryja, EKH-kabiniet, fizijaterapieŭtyčny, masažny, stamatałahičny, renthienaŭski, chirurhičny, terapieŭtyčny, piedyjatryčny.

Centralnaja rajonnaja balnica znachodzicca ŭ Žytkavičach.

U žančyny zastałosia jašče dvoje dziaciej — starejšy syn i siastra Ani.

Tut.by nie ŭdałosia atrymać kamientar pa situacyi ni ŭ Turaŭskaj balnicy, ni ŭ abłzdravie, ni ŭ pres-sakratara Ministerstva achovy zdaroŭja.

U Śledčym kamitecie raspaviali, što ŭ toj dzień Ania ŭdzielničała ŭ školnym zabiehu na dystancyju 500 mietraŭ. Prabiehšy niekalki dziasiatkaŭ mietraŭ, dziaŭčynka adčuła niedamahańnie i spyniłasia. Samaadčuvańnie rezka pahoršyłasia.

— Była vyklikanaja bryhada chutkaj miedycynskaj dapamohi. Školnicu nieadkładna dastavili ŭ Turaŭskuju balnicu, dzie akazali pieršuju miedycynskuju dapamohu. U metach akazańnia kvalifikavanaj dapamohi lekarami vuzkich śpiecyjalnaściaŭ dzicia źmiaścili ŭ aŭtamabil chutkaj dapamohi dla transparciroŭki ŭ Žytkavickuju CRB. U aŭtamabili stan dziaŭčynki pahoršyłasia i, niahledziačy na ​​reanimacyjnyja mierapryjemstvy, jana pamierła.

Pa hetym fakcie pravodzicca pravierka, u jaje ramkach kanfiskavana ŭsia miedycynskaja dakumientacyja, jakaja tyčycca akazańnia dziaŭčyncy mieddapamohi. Dla vyśviatleńnia dakładnaj pryčyny śmierci pryznačana sudova-miedycynskaja ekśpiertyza.

• 0
• 0
• 0
• 0
• 0
• 0
• 0
• 0