Раптоўная смерць трэцякласніцы Ані Зямлянік з Турава, якой 17 мая стала дрэнна падчас школьнай спартыўнай віктарыны, пакуль выклікае шмат пытанняў. Мама дзяўчынкі Таццяна Зямлянік была з дачкой з таго моманту, як ёй раптам стала дрэнна, і амаль да яе смерці — і распавяла Tut.by, што здарылася.
Таццяна працуе настаўнікам у гэтай жа школе №2, дзе вучылася яе Аня. Па словах жанчыны, яшчэ за пяць хвілін да пачатку спартакіяды яна бачыла сваю дачку, яна ні на што не скардзілася і была вясёлай. Усё як заўсёды. А ўжо праз хвілін 15 да Таццяны прыбеглі дзеці: «Вашай Аньцы дрэнна!».
— Аня казала, што кружыцца галава, страчвала прытомнасць. Выклікалі хуткую. Чакалі. Хуткая ехала 40 хвілін, хоць станцыя зусім побач, — распавядае жанчына.
Калі мама з дачкой апынуліся ў прыёмным пакоі, лекары, кажа жанчына, таксама не спяшаліся.
— Нам не зрабілі ні кардыяграму, ні УГД. Кропельніцу і тое шукалі, хто б мог паставіць. Аня страчвала прытомнасць, прасіла піць — і я сама рабіла ёй штучнае дыханне. Праз гадзіну нас адправілі ў Жыткавічы, але потым хуткую вярнулі назад у Тураў. Сказалі, маўляў, выпала кропельніца. Пасля гэтага мяне з машыны «папрасілі». І наступную гадзіну, да прыезду рэаніматолагаў з Жыткавіч, мяне да яе ўжо не пускалі, — успамінае Таццяна.
Неўзабаве Аня памерла.
Таццяна кажа, што яе дачка была здаровай, актыўнай дзяўчынкай, займалася танцамі і ніколі не скардзілася на здароўе.
— Сваё дзіця я ўжо не вярну. Але ніхто не ведае, што можа здарыцца ў наступны раз. Раней у нас была бальніца з дзіцячым, хірургічным і іншымі аддзяленнямі. Але зараз у горадзе з трохтысячным насельніцтвам — а ёсць яшчэ і насельніцтва навакольных вёсак! — ні спецыялістаў, нічога, — кажа Таццяна.
Тураўская гарадская бальніца складаецца са стацыянара на 15 ложкаў сястрынскага догляду і паліклінікі. У ёй ёсць лабараторыя, ЭКГ-кабінет, фізіятэрапеўтычны, масажны, стаматалагічны, рэнтгенаўскі, хірургічны, тэрапеўтычны, педыятрычны.
Цэнтральная раённая бальніца знаходзіцца ў Жыткавічах.
У жанчыны засталося яшчэ двое дзяцей — старэйшы сын і сястра Ані.
Tut.by не ўдалося атрымаць каментар па сітуацыі ні ў Тураўскай бальніцы, ні ў аблздраве, ні ў прэс-сакратара Міністэрства аховы здароўя.
У Следчым камітэце распавялі, што ў той дзень Аня ўдзельнічала ў школьным забегу на дыстанцыю 500 метраў. Прабегшы некалькі дзясяткаў метраў, дзяўчынка адчула недамаганне і спынілася. Самаадчуванне рэзка пагоршылася.
— Была выкліканая брыгада хуткай медыцынскай дапамогі. Школьніцу неадкладна даставілі ў Тураўскую бальніцу, дзе аказалі першую медыцынскую дапамогу. У мэтах аказання кваліфікаванай дапамогі лекарамі вузкіх спецыяльнасцяў дзіця змясцілі ў аўтамабіль хуткай дапамогі для транспарціроўкі ў Жыткавіцкую ЦРБ. У аўтамабілі стан дзяўчынкі пагоршылася і, нягледзячы на рэанімацыйныя мерапрыемствы, яна памерла.
Па гэтым факце праводзіцца праверка, у яе рамках канфіскавана ўся медыцынская дакументацыя, якая тычыцца аказання дзяўчынцы меддапамогі. Для высвятлення дакладнай прычыны смерці прызначана судова-медыцынская экспертыза.
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень12
Каментары