18-hadovaja biełaruskaja dyzajnierka stvaryła kalekcyju adzieńnia i vyrašyła paraicca z karalevaj Vialikabrytanii
Evielina Aŭhuścinovič z Hrodna stvaryła svaju pieršuju kalekcyju adzieńnia ŭ etnastyli. I paraicca, nakolki jana moža być paśpiachovaj, vyrašyła z samoj Jelizavietaj II.
«Usim viadoma, što karaleva Vialikabrytanii taja jašče modnica. Tamu kali maja pieršaja kalekcyja była hatovaja, ja vyrašyła spytacca jaje mierkavańnie, jak joj padajecca, ci moža adzieńnie ź biełaruskim kałarytam być sučasnym i modnym. List u Bukinhiemski pałac ja adpraviła ŭ krasaviku, da jaho dadała fotazdymki svajoj kalekcyi, i voś litaralna na dniach u paštovaj skryni ŭbačyła adkaz ad karalevy», — raskazvaje dziaŭčyna.
U zvarotnym liście z Bukinhiemskaha pałaca Evielinie padziakavali za list i cikavaść da historyi.
U pieršuju kalekcyju Evieliny Aŭhuścinovič, jakuju jana nazvała «Na dośvitku novaha śvietu», uvajšło piać ilnianych błakitna-biełych sukienak, upryhožanych biełaruskim arnamientam.
«Ja zajmałasia madelnym biznesam, časta vystupała ŭ roznych pakazach, źviartała ŭvahu na toje, što prapanujuć dyzajniery. I niejak padumała, što mnie samoj jość što skazać. Prydumała madeli, namalavała ich, zatym uvasobiła ŭ žyćcio. Ciapier udzielničaju ŭ konkursach.
Viedajecie, spałučeńnie błakitna-biełych koleraŭ i biełaruskaha arnamientu vyhladaje vielmi sučasna i pryhoža», — upeŭnienaja dyzajnierka.
Pry hetym Evielina Aŭhuścinovič zajmajecca nie tolki dyzajnam. Jana vučycca ŭ humanitarnym kaledžy ŭ Hrodnie, Evielina — budučy chareohraf.
«Ja liču, što možna sumiaščać niekalki vidaŭ dziejnaści, i tancy dyzajnieru nie pieraškoda. Zaraz ja raspracoŭvaju jašče dźvie ŭłasnyja kalekcyi. I ŭžo dumaju nad tym, čyjo mierkavańnie spytacca na hety raz. Nie vyklučaju, što dašlu fota kalekcyi jakomu-niebudź suśvietna viadomamu madeljeru», — kaža Evielina Aŭhuścinovič.
Ciapier čytajuć
Adzin z zahinułych siońnia vajskoŭcaŭ — 26‑hadovy minčuk Kirył. Što pra jaho viadoma6
Kamientary