Protaijerej Sierhij Hardun: Treba aktyvizavać pracesy biełarusizacyi i ŭ hramadstvie, i ŭ carkvie

Protaijerej Sierhij Hardun, pieršy prarektar Instytuta teałohii BDU, u kułuarach śviatkavańnia 30-hodździa BPC adkazaŭ na niekalki pytańniaŭ «Našaj Nivy» nakont biełaruskaści carkvy. 

Ajciec Sierhij unikalny tym, što biełaruskaja mova dla jaho nie niešta nabytaje. Jon pačuŭ ruskuju tolki ŭ škole. 

Čytajcie taksama: Protaijerej BPC Sierhij Hardun: Da škoły ja ruskaj movy naohuł nie čuŭ. Tolki biełaruskuju

Pavialičyć

«Naša Niva»: Ci zadavoleny vy stanam biełaruskaj movy ŭ carkvie?

Sierhij Hardun: Stan movy ŭ carkvie taki ž samy, jak i ahułam u krainie — carkva nie moža być adarvanaj ad hramadstva, my karystajemsia tymi ž movami. Voś havorać pra niejkuju miakkuju biełarusizacyju, ale ja, skažu ščyra, jaje nie nadta adčuvaju, što na vulicy, što ŭ carkvie. Ja dumaju, hety praces treba aktyvizavać paŭsiul.

U nas niešta robicca: jość šerah śviataroŭ, jakija prapaviedujuć pa-biełarusku. My zrabili pierakład Novaha Zapavietu pa-biełarusku, vydali jaho, raspaŭsiudzili pa jeparchijach, bolš taho — jaho pieravydała mižnarodnaja pratestanckaja arhanizacyja «Hiedeony». Davoli vialiki nakład — 30 tysiač! Jany sami jaho raspaŭsiudžvajuć — u balnicach, u haścinicach. Kali božaje pisańnie raspaŭsiudžvajecca pa-biełarusku, ja dumaju, heta spryjaje. 

Ja viedaju ludziej asabista, jakija paŭsiadzionna nie vielmi aktyŭnyja ŭ biełaruskaj havorcy, ale z zadavalnieńniem čytajuć Śviaščennaje pisańnie, nu prosta z zadavalnieńniem!

Časam čałaviek havoryć na toj movie, na jakoj havoryć jaho asiarodździe. A voś vybrać, na jakoj movie čytać — u hetym tabie nijaki faktar nie pieraškodzić.

U carkoŭnych škołach jość mahčymaść vieści ź dzietkami zaniatki pa-biełarusku, kali b takija prychodzili, ale ich, na žal, niama.

«NN»: Mitrapalit Pavieł časam pryvodzić prykład, što, maŭlaŭ, niedzie pačali słužyć pa-biełarusku, a vierniki aburylisia. Hetamu možna vieryć?

SH: Siarod duchavienstva Kafiedralnaha sabora, dzie i ja słužu, była inicyjatyva, kab słužyć pa-biełarusku. Mitrapalit Pavieł dazvoliŭ. Ale znajšlisia prychadžanie, jakija stali pratestavać: skazali, što jość carkoŭnasłavianskaja mova, na jakoj carkva molicca daŭno, i my, maŭlaŭ, chočam praciahvać tradycyju. 

Kolki ich było? A chto ich ličyŭ… Nijakaj statystyki niama, bolš kryklivaja častka zajaviła ad imia inšych prosta ŭ carkvie paśla słužby. Heta skazali mitrapalitu, ja pry hetym prysutničaŭ.

Nu što skazać? Čałaviek maje prava malicca na toj movie, na jakoj havoryć. U tym ža Pietrapaŭłaŭskim sabory, jaki praz darohu, pastajanna pravodziacca słužby pa-biełarusku. Toj, chto choča malicca pa-našamu, prosta pierachodzić darohu.

• 2
• 0
• 0
• 0
• 0
• 0
• 0
• 0