BT pakazała film pra «cukrovuju spravu». U čym abvinavačvajuć dyrektaraŭ?
Štohadovy pamier chabaraŭ fihurantam «cukrovaj spravy» ličyŭsia sotniami tysiač dalaraŭ ZŠA. Takuju infarmacyju ahučyli ŭ efiry BT-1.
Śćviardžajecca, što šyrmaj dla karupcyjnaj schiemy stała Biełaruskaja cukrovaja kampanija.
Dyrektary čatyroch biełaruskich cukrovych zavodaŭ nibyta ŭstupili ŭ złačynnuju zmovu z kiraŭnikom Biełaruskaj cukrovaj kampanii Kiryłavym, a taksama pradstaŭnikom rasijskich kamiercyjnych struktur Kananienkam. Śćviardžajecca, što chabary płacili za arhanizacyju adhruzki biełaruskaha cukru ad Biełaruskaj cukrovaj kampanii ŭ adras peŭnych papiarednie ŭzhodnienych kamiercyjnych struktur. Štohod sumy chabaraŭ ličylisia sotniami tysiač dalaraŭ ZŠA.
Kryminalnaja schiema pracavała nastupnym čynam: čatyry zavody adhružali ŭvieś ekspartny abjom Biełaruskaj cukrovaj kampanii. Dalej značnaja častka sychodziła padkantrolnym pasiarednikam.
U siužecie śćviardžajuć, što za heta Kananienka pry dapamozie Kiryłava pieradavaŭ dyrektaram zavodaŭ niezakonnaje hrašovaje ŭznaharodžańnie ŭ pamiery ad $1 da $2,5 za kožnuju tonu adhružanaj pradukcyi.
Pavodle apieratyŭnych danych, niezakonny dachod ličyŭsia miljonami dalaraŭ.
Pavodle śledstva, u Rasiei była stvorana firma-prakładka dla pastaŭki syraviny «Palimir», a ŭ Biełarusi — zavod-manapalist pa vytvorčaści miaškoŭ dla cukru «Jeŭratareks». Miascovy zavod vielmi chutka pačaŭ pracavać u nul, uvieś prybytak zastavaŭsia na rachunkach rasijskaha pasiarednika, hatoŭka źnimałasia i raźmiarkoŭvałasia pamiž zmoŭčšykami. Faktyčnym arhanizataram schiemy vystupiŭ dyrektar Haradziejskaha cukrovaha kambinata Michaił Kryštapovič. U padziele prybytku udzielničali taksama dyrektar Biełaruskaj cukrovaj kampanii Dźmitryj Kiryłaŭ i rasijski pradprymalnik Kananienka, jaki i ažyćciaŭlaŭ faktyčny kantrol nad «Palimiram». Dyrektary astatnich troch zavodaŭ taksama byli ŭciahnutyja ŭ supraćpraŭnuju dziejnaść, śćviardžajecca ŭ siužecie.
Pavodle telekanała, letaś sumarny «minus» čatyroch cukrovych zavodaŭ u Žabincy, Skidzieli, Haradziei i Słucku dasiahaŭ 200 młn rubloŭ.
Kamientary