Amierykanskija sienatary ŭ sieradu pryznali nievinavatym prezidenta ZŠA Donalda Trampa pa ŭsich punktach abvinavačvańnia ŭ ramkach słuchańniaŭ pa impičmientu, piša interfax.ru.
Sienatary bolšaściu hałasoŭ adchilili abodva punkty abvinavačvańnia: złoŭžyvańnie ŭładaj i stvareńnie pieraškod rasśledavańniu, jakoje pravodziŭ Kanhres. U pieršym vypadku za apraŭdańnie Trampa vystupili 52 sienatary, a 48 paličyli jaho vinavatym. U druhim vypadku apraŭdać prezidenta vyrašyli 52 člena sienata, a 47 pryznali jaho vinavatym. Suprać Trampa prahałasavaŭ tolki adzin respublikaniec — Mit Romni, na pieršym hałasavańni jon pryznaŭ jaho vinavatym u złoŭžyvańni paŭnamoctvami.
Dla taho, kab prezidenta pryznali vinavatym i, adpaviedna, adchilili ad pasady, patrabavałasia, kab dźvie traciny sienataraŭ vystupili ŭ padtrymku choć by adnaho punkta abvinavačvańnia. Takim čynam praces impičmientu ŭ Kanhresie zaviaršyŭsia. Tramp zastajecca na pasadzie prezidenta.
Tramp staŭ trecim prezidentam u historyi ZŠA, u dačynieńni da jakoha inicyjavali praceduru impičmientu. Pieršym byŭ Endru Džonsan ŭ 1868 hodzie, druhim — Bił Klintan u 1998 hodzie. Usich prezidentaŭ apraŭdaŭ Sienat.
Taksama praceduru impičmientu Pałata pradstaŭnikoŭ ZŠA sprabavała pačać u 1973 hodzie ŭ dačynieńni da Ryčarda Niksana, adnak Niksan syšoŭ u adstaŭku sam.
U dačynieńni da Trampa demakraty ŭ Pałacie pradstaŭnikoŭ inicyjavali praceduru impičmientu 24 vieraśnia 2019 hoda, paśla taho, jak amierykanski infarmatar vykazaŭ zaniepakojenaść u suviazi z telefonnaj razmovaj prezidenta ZŠA z ukrainskim prezidentam Uładzimiram Zialenskim. U časie razmovy Tramp zaklikaŭ Zialenskaha pačać rasśledavańnie ŭ dačynieńni da eks-vice-prezidenta ZŠA Džo Bajdena i jaho syna Chantera, a taksama mierkavanaha ŭmiašańnia ŭ amierykanskija vybary 2016 hoda z terytoryi Ukrainy.
Pałata pradstaŭnikoŭ, u jakoj bolšaść naležyć demakratam, u vyniku vystaviła Trampu dva abvinavačańni — u złoŭžyvańni ŭładaj i ŭ pieraškodzie rasśledavańniu Kanhresu.
Sprava była pieradadzienaja ŭ Sienat dla praviadzieńnia sudovaha pracesu ŭ studzieni hetaha hoda. Sumnievaŭ u tym, što Sienat nie prymie abvinavačvańni suprać Trampa, nie było, bo bolšaść u hetaj pałacie Kanhresa naležyć respublikancam.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam25
Kamientary