U Polščy pabili palaka ź Biełarusi z krykam «Polšča dla palakaŭ»
Polskaja palicyja šukaje vinavatych u źbićci inšaziemcaŭ, jakoje adbyłosia ŭnačy z suboty na niadzielu ŭ Starym horadzie Torunia, piša Radyjo Svaboda sa spasyłkaj na Gazeta Wyborcza. Piaciora zamiežnikaŭ atrymali ranieńni. Siarod ich byŭ i hramadzianin Biełarusi.
Zdareńnie adbyłosia kala 1.30 unačy. Siarod achviaraŭ napadu — hramadzianie Biełarusi, Polščy, Rasiei i Ŭkrainy. Hrupa siabroŭ akurat nakiroŭvałasia ŭ Stary horad, pamiž saboj jany razmaŭlali na rasiejskaj movie. Supracoŭniki palicyi zajavili presie, što napad adbyŭsia pa nacyjanalnaj prykmiecie.
Napadnikaŭ było siamiora. Ich fotazdymki apublikavała miascovaja kamendatura palicyi.
— U ich nie było prablem, kab bić navat dziaŭčynu. Siabra, repatryjavany palak, maje pierałom kości čerapa, ale, na ščaście, heta nie tak surjozna. Na nas napali pad lozunhami «Polšča dla palakaŭ» i «*** ukraincaŭ». Dadam, što tolki dvoje ź piaci byli ŭkraincami. Bolš za ŭsio mianie ŭraziła pasiŭnaść ludziej, jakija nie reahavali i abyjakava prachodzili pobač, — napisaŭ u Fejsbuku śviedka zdareńnia, hramadzianin Polščy.
Svaboda skantaktavałasia z maładym čałaviekam. U razmovie z nami jon dadaŭ, što samyja surjoznyja traŭmy atrymaŭ palak, jaki repatryjavaŭsia z Rasiei. Jamu buduć rabić aperacyju. Siarod achviaraŭ byŭ i hramadzianin Biełarusi, etničny palak. Pra heta skazaŭ Svabodzie zhadany śviedka.
— Jon nie ŭ špitali. Ź im usio ŭ paradku.
Śviedka źbićcia raspavioŭ, što pryčynaj źbićcia była rasiejskaja mova, na jakoj razmaŭlała kampanija siabroŭ. Napadniki napali na ich, syšli, a praź niekatory čas viarnulisia i praciahnuli źbićcio.
Niadzielny incydent u Toruni asudziŭ mer Michał Zaleski.
— Heta bandytyzm i nadzvyčajnaja prajava nienaviści, ź jakimi nielha źmirycca. Ja rašuča asudžaju takija pavodziny! Ja spadziajusia, što palicyja chutka vyjavić vinavatych, a sud ich pakaraje. Nul talerantnaści da bandytaŭ!
Ciapier čytajuć
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska1
Kamientary