Ustanoŭčaja kanfierencyja Sacyjał-demakratyčnaj partyi «Svaboda» adbudziecca ŭ vieraśni.
Pra heta BiełaPAN paviedamiŭ lider arhkamiteta pa stvareńni partyi Siarhiej Skrabiec.
«Dva viasnovyja miesiacy i leta arhkamitet budzie pracavać u rehijonach i ŭ Minsku, kab na momant praviadzieńnia ŭstanoŭčaj kanfierencyi ŭ partyi było pryblizna 1,5 tys. čałaviek», — paviedamiŭ jon.
Pavodle słoŭ S.Skrabca, na nastupnym tydni arhkamitet partyi budzie chadajničać ab svaim uvachodžańni ŭ Jeŭrapiejskuju kaalicyju.
U jaje ciapier uvachodziać arhkamitety pa stvareńni Biełaruskaj sacyjał-demakratyčnaj partyi (Narodnaja Hramada) i Partyi svabody i prahresu, a taksama zarehistravanaje ŭ Čechii maładziožnaje abjadnańnie «Małady front».
Palityk paviedamiŭ, što ŭ rehijonach partyju pradstaŭlajuć ludzi małaviadomyja. «My nie pieramańvajem aktyvistaŭ ź inšych partyj abo viadomych palitykaŭ. My robim staŭku na pradstaŭnikoŭ moładzi i biźniesu», — skazaŭ jon.
S.Skrabiec zaznačyŭ, što partyja niezaležna ad taho, budzie jana zarehistravana ci nie, voźmie ŭdzieł u čarhovych prezidenckich vybarach. «Na pačatak vybarčaj kampanii my raźličvajem sabrać tysiaču aktyŭnych čałaviek, jakija byli b navučanyja zboru podpisaŭ. Adzin čałaviek 100 podpisaŭ sabrać za miesiac zdoleje. Tamu raźličvajem sabrać 100 tysiač podpisaŭ, nieabchodnych dla rehistracyi kandydatam u prezidenty», — skazaŭ jon.
Nahadajem, u pačatku sakavika S.Skrabiec zajaviŭ pra vychad ź Biełaruskaj sacyjał-demakratyčnaj Hramady, jakuju ŭznačalvaje Stanisłaŭ Šuškievič.«Kali ludzi nie znachodziać ahulnaj movy, im lepš razyścisia. U mianie roznahałośsi z Šuškievičam jak u turhienieŭskich «Baćkach i dzieciach». Sa mnoj u partyju pryjšła hrupa maładych. My žadali bolš aktyŭnaj, ja b navat skazaŭ ekstremalnaj pracy, ale aściarožnaja i pasiŭnaja pazicyja kiraŭnictva partyi pa parłamienckich vybarach, pa budučych prezidenckich vybarach, pa mižnarodnaj pracy nas nie zadavalniała», — prakamientavaŭ palityk svajo rašeńnie.
Ciapier čytajuć
«Abo my ciabie zhvałcim, abo ty paholiš baradu razam z hałavoj». Łachvič raskazaŭ, što ź im adbyłosia13
Kamientary