Jak paviedamiła BiełaPAN zahadčyca adździeła hramadskaha zdaroŭja Respublikanskaha centra hihijeny, epidemijałohii i hramadskaha zdaroŭja Volha Bartman, meta akcyi — infarmavańnie ludziej ab sardečna‑sasudzistych zachvorvańniaŭ i mierach ich prafiłaktyki.
U hety dzień śpiecyjalisty‑kardyjołahi praviaduć kansultacyi ŭ paliklinikach i Minskim haradskim kardyjałahičnym dyspansiery.U dyspansiery budzie arhanizavana mini‑akcyja «Bieražy serca»: usim supracoŭnikam i naviednikam pamierajuć cisk i razdaduć infarmacyjnyja materyjały.
Sardečna‑sasudzistyja zachvorvańni (SSZ) źjaŭlajucca asnoŭnaj pryčynaj śmiarotnaści ŭ śviecie. Pavodle źviestak hałoŭnaha pazaštatnaha kardyjołaha Ministerstva achovy zdaroŭja Alaksandra Mročaka, u Biełarusi dola chvarob sistemy krovazvarotu ŭ struktury ahulnaj śmiarotnaści nasielnictva ŭ 2008 hodzie skłała 52,6%. Usiaho letaś na 10 tys. darosłaha nasielnictva prypadała 297,5 čałavieka z takimi zachvorvańniami. U paraŭnańni z 2007 hodam na 3,6% pavialičyłasia kolkaść ludziej, jakim upieršyniu dyjahnastavali chvaroby sistemy krovazvarotu.
Rost zachvorvańnia, na dumku miedykaŭ, abumoŭleny takimi faktarami, jak ahulnaje stareńnie nasielnictva, vysokija psichaemacyjanalnyja nahruzki, finansava‑ekanamičny kryzis, i inšymi.
Asabliva vialikaja ryzyka SSZ u mužčyn stałaha ŭzrostu, mnohija ź jakich viaduć małaaktyŭny ład žyćcia, kurać i złoŭžyvajuć ałkaholem. Ryzyka zachvorvańnia pavyšajecca pry arteryjalnaj hipiertenzii, dyślipidemii, atłuścieńni, cukrovym dyjabiecie.
Dla prafiłaktyki SSZ miedyki rekamiendujuć admovicca ad kureńnia, štodzionna ŭžyvać aharodninu i sadavinu, chadzić pa try kiłamietry ŭ dzieńabo zajmacca na praciahu paŭhadziny lubymi inšymi fizičnymi praktykavańniami z umieranaj nahruzkaj, paźbiahać atłuścieńnia i prymać prafiłaktyčnyja miery suprać zachvorvańnia na cukrovy dyjabiet.
Kamientary