Siońnia na vybarach u Džordžyi vyrašajecca budučynia Bajdena-prezidenta

Adzin-adziny amierykanski štat vyznačyć u aŭtorak, jakim budzie prezidenctva Džo Bajdena. Džordžyja zapaŭniaje dva apošnija vakantnyja miescy ŭ Sienacie, i kali chacia b chto-niebudź z respublikancaŭ pieraabiarecca, partyja Donalda Trampa atrymaje suciašalny pryz za parazu na prezidenckich vybarach i zachavaje kantrol nad hałoŭnaj pałataj amierykanskaha parłamienta, piša BBC.

Kali ž demakraty paŭtorać niejmaviernaje dasiahnieńnie listapadaŭskich prezidenckich vybaraŭ i vyjhrajuć tradycyjna respublikanski štat, to jany sarvuć džekpot: Bieły dom, sienat i pałatu pradstaŭnikoŭ Kanhresa ZŠA.

U hetym vypadku Bajden-prezident nie budzie źviazany pa rukach i nahach respublikanskim Sienatam i zmoža pravieści reformy. Dla hetaha niedastatkova prezidenckich ukazaŭ, treba mianiać zakony — a za heta adkazvaje Kanhres.

Kali ž respublikancy zachavajuć chaj minimalnuju, ale bolšaść u Sienacie, jany paralizujuć zakanadaŭčuju dziejnaść demakrataŭ. Biez padtrymki sienata i źmieny zakonaŭ lubyja reformy Bajdena-prezidenta buduć jašče bolš chutkapłynnyja, čym navacyi Trampa, ich hetak ža zmoža abnulić nastupny prezident.

Tamu vybary sienataraŭ u dźviuch akruhach Džordžyi stali spabornictvam nie rehijanalnaha, a ahulnanacyjanalnaha maštabu. Za kandydataŭ ahitavali asabista i Tramp, i Bajden.

Sa 100 miescaŭ u klučavoj pałacie Kanhresa respublikancy kantralujuć 50. U demakrataŭ 48, a dva zastalisia jakraz na konie ŭ Džordžyi. Pry raskładzie 50 na 50 prava vyrašalnaha hołasu — za vice-prezidentam Kamałaj Charys.

Demakraty takim čynam atrymlivajuć bolšaść. Naŭrad ci takoj ścipłaj pieravahi chopić dla rašučych reformaŭ, ale ŭsio roŭna heta lepš, čym prezident-demakrat pry respublikanskim Sienacie. Spytajcie Baraka Abamu.

U Džordžyi, u adroźnieńnie ad pieravažnaj bolšaści amierykanskich štataŭ, dla pieramohi na vybarach u sienat patrabujecca 50% plus adzin hołas — inakš pryznačajecca druhi tur.

Sienatary-respublikancy Devid Pierdju i Keli Lefler nie zmahli pieraabracca ŭ pieršym tury i vyjšli ŭ druhi, dzie im supraćstajać dva demakraty: žurnalist-daśledčyk Džon Osaff i pastar Rafael Uornak.

Džordžyja — votčyna respublikancaŭ, demakraty tut nie vyjhravali ŭžo niekalki dziesiacihodździaŭ. Ale Tramp i źmienlivaja demahrafija pieraviali štat u ranh tych, što vahajucca.

Respublikaniec Pierdju nie daciahnuŭ da pieraabrańnia ŭ pieršym tury doli pracenta: 71-hadovy sienatar atrymaŭ 49,8% suprać 47,9% u 33-hadovaha Osafa.

U paralelnaj honcy pieršym pryjšoŭ demakrat Uornak, ale jon nabraŭ tolki 33% hałasoŭ. Druhoje miesca zaniała Lefler z 26%.

Hałasavańnie ŭ štacie pačałosia ŭžo daŭno, a padlik hałasoŭ startuje ŭviečary ŭ aŭtorak pa miascovym časie (adrazu paśla paŭnočy ŭ Jeŭropie). Kančatkovych vynikaŭ daviadziecca pačakać, jak pakazali prezidenckija vybary.

• 0
• 0
• 0
• 0
• 0
• 0
• 0
• 0