Rasijskaja akupacyja admianiajecca

U manieŭrach «Zachad-2009» buduć udzielničać ahulnym likam 13 tysiač vajskoŭcaŭ. Pra heta zajaviła pres-słužba Ministerstva abarony Biełarusi. Takim čynam, siensacyja pra dźvie rasijskija armii — vypuščanaja z Maskvy «vutka».

Pavialičyć

Što ž, u našym vajskovym viedamstvie narešcie schamianulisia i stali zamaskavana abviarhać ašałamlalnuju zajavu načalnika rasijskaha hienštaba hienierała Makarava. Pamiatajecie: nibyta dźvie ichnyja armii ŭ poŭnym składzie buduć uviedzieny ŭvosień u Biełaruś dziela supolnych manieŭraŭ.

Admysłoŭcam absurdnaść słoŭ Makarava (ci ich žurnalisckaj interpretacyi) była vidavočnaja ad pačatku.

«U Rasii ŭvohule nie nabiarecca dźviuch bajazdolnych armij, — skazaŭ mnie minski vajskovy analityk Alaksandr Alesin. — I samo heta paniaćcie tam adžyvaje. Reforma rasijskaha vojska palahaje ŭ tym, što admaŭlajucca ad armij i pierachodziać na strukturu “bryhada — korpus — kamandavańnie”».

So słoŭ Alesina, armija — heta 80 tysiač sałdataŭ z technikaj. Kab pierakinuć takuju proćmu vajakaŭ z usimi ich cackami, spatrebilisia b sotni ciahnikoŭ. Vydatki kałasalnyja. A kali dźvie armii… «Kazać pra takuju pierakidku nie dazvalaje ni ekanomika, ni łahistyka, ni elemientarnaja łohika», — reziumavaŭ Alesin.

Dadamo: u elemientarnuju palityčnuju łohiku heta taksama nie ŭłazić. Kali b rasijcy i nadumali navadnić Biełaruś svami vojskami pad vyhladam manieŭraŭ, to Łukašenka nie taki naiŭny ŭ pytańniach zachavańnia ŭłady (ci niechta jašče sumniavajecca?), kab davać zhodu. Jon, darečy, jašče 10 sakavika padpisaŭ zadumu imprezy pad supierkreatyŭnaj :) nazvaj «Zachad-2009». Tam i zakładziena hetaja ličba — 13 tysiač (ź ich rasijcaŭ 4-5 tysiač).

Darečy, pry ciapierašnim abvastreńni dačynieńniaŭ zaklatych chaŭruśnikaŭ niama harantyi, što i hetych puściać. Manieŭry mohuć sarvacca abo skamiačycca. Ci, va ŭsiakim razie, Minsk pasprabuje ŭ zvykłym styli lohkaha šantažu vybić pad hetu spravu niejkich novych vajskovych brazhotak za biascenak.

Zvyš usiaho, pierakidka 160 tysiač rasijskich sałdataŭ z technikaj da miežaŭ NATO była b parušeńniem damovy ab zvyčajnych uzbrajeńniach u Jeŭropie, zaznačaje Alesin. Zachad staŭ by na vušy. Łukašenku heta zaraz treba?

Inšaja reč, što va ŭmovach suvierennaj aŭtakratyi i zvyšpryviazki da vialikaj susiedki lubaja pahałoska pra čarhovuju «zdaču Biełarusi» padaje na spažyŭnuju hlebu. Zrazumieła, apazicyjnym palitykam hrech nie ŭdaryć u zvon. Ale varta i z ekśpiertami kansultavacca, kab vyhladać u svaich zajavach nie tolki patetyčna, ale i bolej-mieniej kampietentna.

Nu, toje, što biełaruski aficyjny bok praspaŭ ź pijar-reakcyjaj na chałasty streł Makarava — nie dziva. Tak było i z devalvacyjaj, i z zajavaj Kudryna. Nadta niaŭkludny hety kazionny ahitprop. A voś čamu Maskva nie stała vypraŭlać lap? Adsočvała reakcyju?

ZY. Kali ichni hienštab čytaŭ forum NN — to mahli i spałochacca :)

• 0
• 0
• 0
• 0
• 0
• 0
• 0
• 0